- - Билигин пайщиктаахпыт лаппа аҕыйаата, Арыктаахха 11 эрэ пайщиктаах баар. Урут киһи барыта пайщиктаах буолан, усунуос да харчыта син киирэрэ, чэпчэтиилэр эҥин оҥоһуллаллара.
- Биһиги чааһынай тэрилтэбит, бэйэбитин бэйэбит көрүнэн олоробут. Үлэни-хамнаһы тэрийэрбитигэр 8 мөл кэриҥэ солкуобай барар. Барыта уон үлэһиттээхпит. Нолуокка 7 мөл. курдугу төлүүбүт, - диэтэТихон Николаевич. - Тиэйии-таһыы ороскуота олус улахан, уматык сыаната ыараата. Килиэп үтэн атыылыыбыт, үүт тутан кыратык эбинэн үлэлиир этибит, онтубут эмиэ мөккүөргэ таҕыста, ити боппуруоска тыа хаһаайыстыбатын тэрилтэлэрэ үлэлэһэ сылдьаллар. Санкциянан сибээстээн кредит бырыһыана наһаа үрдээтэ, тэрилтэлэр харчыга эрэ үлэлэһэ сатыыллар.
- Биһиги аһа-үөлү, дьоҥҥо наадалаах малы-салы, быһата хамаҕатык атыыга барар табаары аҕала сатыыбыт. Үп эргиирин түргэтитиэхтээхпит. Түннүк тааһын, тутуу матырыйаалын кыайан аҕалбаппыт. Бу нэһилиэктэртэн үчүгэй сакаас киирбэтиттэн буолар, чуолкай сакаас баар буоллаҕына хас да бөһүөлэккэ биирдэ аҕалабыт.
- Эппитим курдук, ыарахаттар баалларын үрдүнэн, 2014 с. былааннарын толордубут. Кредит боппуруоһа кытааппытынан, үлэбит лаппа бытаарда, ол да буоллар быйыл кэлэр таһаҕаһы сакаастаан, булан турабыт, таһа сылдьабыт, - диэтэ Тихон Николаевич.
- Салгыы пайщиктаахтар тыл эттилэр, араас этиилэр киирдилэр. Холобура, биир эмэ үөрүүлээх түгэҥҥэ бу аҕыйах пайщиктаахха чэпчэтиилээх атыыны тэрийиэххэ, кыра бэлэх да оҥоһуллуон эттилэр. Үгүстэр сакааһынан таһаҕас кэлиитин сөбүнэн аахтылар. Сыана манна чааһынай маҕаһыыннардааҕар чэпчикитин бэлиэтээн туран, потребительскай уопсастыба ааспыт сыллааҕы үлэтин үчүгэйинэн сыаналаатылар, таһаҕаһы таһыыны элбэтэргэ эттилэр.
- Түмүккэ Тихон Николаевич потребительскай уопсастыба үлэтин үчүгэйинэн сыаналаабыттарын иһин олохтоохторго махтанна. Сакааһынан таһаҕаһы аҕалар барыстааҕын ыйда, кыах баарынан бу ыарахан кэмҥэ өссө эрчимнээхтик үлэлиэхпит диэн эрэннэрдэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети