Төһө да тымныытын, күүстээх тыаллааҕын, тибиилээҕин иһин, болуоссакка элбэх омук дьоно, ыччаттар уонна аҕа саастаах дьон муһуннулар.

Республика салалтатын аатыттан мустубут дьону президент уонна правительство администрациятын салайааччыта Юрий Куприянов эҕэрдэлээтэ. «Бүгүнҥҥү бырааһынньыгы Саха сирэ Россия государствотын састаабыгар киирбитэ 375 сылыгар аналлаах өйдөбүнньүк аттыгар көрсүбүппүт бэлиэ. Бу аныгы Россия сомоҕолоһуулааҕын уонна түмсүүлээҕин кэрэһэлиир. Республика бары олохтоохторун эҕэрдэлиибин уонна бэйэҕит хас биирдии чугас дьоҥҥутун, доҕотторгутун кытта дууһаҕыт сылааһын уонна сырдыгын үллэстэргитигэр баҕарабын», - диэтэ кини.

«Бу күн олус дириҥ историческэй силистээх, онон дьиҥнээх норуот бырааһынньыгар — омуктар сомоҕолоһууларын уоннна доҕордоһууларын бырааһынньыгар кубулуйуон баҕарабын», - диэн бэлиэтээтэ Саха сирин Госмунньаҕын вице-спикерэ Ольга Макиенко.

«Биһиги элбэх национальностаах сиргэ олорорбутун умнуо суохтаахпыт. Төһө да атын-атыммытын иһин, биһиги күүспүт- сомоҕолоһууга. Мин омуктар икки ардыларыгар доҕордоһуу уонна сомоҕолоһуу - Россия уонна Саха сирин инникитэ буолуо диэн эрэллээхпин», - диэтэ Дьокуускай мэрэ Айсен Николаев.