Билиҥнитэ ааттана илик культура-спорт комплекса республика таһымыгар баараҕай тутуу. Универсальнай сааланы таһынан тустууга уонна боксаҕа эбии саалалар бааллар. Икки этээстээх тутууга гостиницаны, кафены уонна 400 көрөөччүгэ анаммыт миэстэни былаанныыллар.

Билигин кырааскалыы, билиитэлэри уура сылдьаллар. «Үлэлии сылдьар биригээдэ 9 киһилээх. Кулун тутартан ыла үлэлиибит. Эбийиэк бэлэмин 70% сыаналыыбыт. Болдьоммут кэмигэр тутуу түмүктэниэҕэ», - диэтилэр СИА-ҕа электромонтажниктар  Дмитрий Пинигин, Айсен Ермолаев уонна Лука Иванов.

Спорт эбийиэгин тиэргэнигэр циэмэни кута, билиитэни уура, күрүөнү-хаһааны тута сылдьаллар. Ыксааһын, тиэтэйии суох.

3 тыһыынча киһини батарарга суоттаныллыбыт стадион тутуллан бүппүтүн кэриэтэ. Манна электриктэр уоту тардаллар, сүүрэр суолу оҥороллор. Электроннай табло хаҕа, түөрт прожектортан иккитэ номнуо бэлэм. Ооннуу уота умайар ымыйатын оҥороллор.  

«Стадиону тутуу сирэ-уота сөптөөх. Саас хаар күүскэ ууллар кэмигэр аренаҕа чалбах суоҕа. Ол аата ирригационнай систиэмэ үчүгэйдик үлэлиир», - диэн суруналыыстарга кэпсээтэ Намнааҕы спорт управлениетын салайааччыта  Павел Иванов.

Стадиоҥҥа оонньууну үөрүүлээхтик аһыы уонна сабыы сиэрэ-туома, чэпчэки атлетикаҕа күрэхтэһии тэриллиэҕэ. Төһө да 3 тыһ. киһи манна батар диэн буоллар, улуус мобильнай трибуналары атыыластаҕына, өссө 2 тыһыынча киһи эбии киирэр кыахтаныа.

«Бэс ыйын бүтүүтэ эбийиэктэр ситиэхтэрэ», - диэн Нам улууһун баһылыга бигэргэттэ.