Спортивнай оонньуу пресс-сулууспата иһитиннэрбитинэн, Өлүөхүмэҕэ күрэхтэһии уота умайыытын үөрүүлээх сиэригэр-туомугар спорт миниистрэ Михаил Гуляев, «Өлүөхүмэ улууһа» МТ баһылыгын солбуйааччы  Евгений Березин, физическэй культура уонна маассабай спорт управлениетын начальнига Николай Цыпандин кытыннылар.

Саха сирин норуоттарын V-c спортивнай оонньуута Өлүөхүмэҕэ үрдүк таһымнаахтык ыытыллыбытын Михаил Гуляев бэлиэтээн эттэ. «Өлүөхүмэ олохтоохторо оонньуу тэрээһиннээхтик ааһарыгар күүстэрин-кыахтарын уурбуттара. Бу күрэхтэһиилэргэ анаан саҥа стадион, аныгы спортивнай комплекс тутуллубута. Түөрт сыл ааспытын кэнниттэн Саха сирин дьоҕус олимпиадатын уота умайар. Уот — улахан күрэхтэһиилэр солбуллубат, аан дойдуга ил-эйэ уонна доҕордоһуу бэлиэтэ буолар», - диэтэ кини.

Стадион устун факеллаах сүүрүү кэнниттэн спортивнай оонньуу уотун экстремал-сүүрүккэ, 2014 сылга Сочитааҕы олимпиадаҕа кыттыбыт Дмитрий Гороховка биэрдилэр.

Икки нэдиэлэ устата 6 киһи оонньуу уота 34 нэһилиэнньэлээх пууннары, ол иһигэр Хаҥалас улууһунан, Дьокуускайынан уонна куорат таһынааҕы бөһүөлэктэринэн Намҥа диэри тиэрдиллэр. От ыйын 9 күнүгэр Намҥа Саха сирин норуоттарын VI спортивнай оонньууларын уота умайыа.

Саха сирин норуоттарын VI-с спортивнай оонньуулара Нам улууһугар от ыйын 9-13 күннэригэр ыытыллар, манна 2250 спортсмен кыттыахтаах.