Тирэх былаан быһыытынан 2016 сылга диэри тэрээһиннэр программаларыгар 5,4 млрд солкуобай ыытыллыа, оттон ордук кэскиллээх, сайдыылаах сценарий быһыытынан үбүлээһин 12,4 миллиардка тиийиэҕэ.

Программаҕа республика уонна олохтоох бюджет, ону таһынан бюджеты таһынан үп туттулуохтара. Программа түөрт стратегическай хайысхаларынан ыытыллыаҕа, олортон хас биирдиилэригэр соруктар туруорулуннулар уонна целевой индикатордар быһаарылыннылар.

Ол курдук, тирэх быһыытынан, маассабай спорду сайыннаран, физкультуранан уонна спордунан дьарыктанааччы гражданнары элбэтиини, нэһилиэнньэ уопсай ахсааныттан 23,3%-нарын (2012 сыллаахха) 2016 сыллаахха 28%-ҥҥа тиэрдэргэ соруктаналлар. Тыа сиригэр ити ахсаана 25,9-тэн 30%-ҥҥа диэри элбиэхтээх.

Оҕо-ыччат спордугар Россия сүүмэрдэммит хамаандатын састаабыгар киирбит эдэр спортсменнар ахсааннарын 35-тэн 45-кэ диэри үрдэтэргэ былаан турар.

Республика спортсменнарын Россия, Европа, аан дойду чемпионаттарыгар уонна Олимпийскай, Паралимпийскай уонна Сурдлимпийскай оонньууларга ситиспит наҕараадалара 19-тан 50-ҥҥэ тиийэ мэтээл буолуохтаах. РФ сүүмэрдэммит хамаандатыгар киирбит спортсменнар ахсааннара 75-тэн 95 киһиэхэ тиийиэхтээх.

Тупса хайысханан саха спордун көрүҥнэрэ киирэллэр. Үс сыл иһигэр 350 тахса спорт национальнай көрүҥнэригэр күрэхтэһии ыытар былаан баар.

Программаҕа киирбит үбүнэн спортивнай тутуулары сөргүтүөхтэрэ уонна тутуохтара. Холобур, номнуо аныгыскы сылга Нам оройуонун Нам сэлиэнньэтигэр культурнай-спортивнай комплекс уонна 3 тыһыынча миэстэлээх стадион, Уус-Алдан Бороҕонугар спортивнай саала киириэхтэрэ, 2016 сыл бүтүүтүгэр диэри Нерюнгрига «Шахтер» спортивнай-чэбдигирдэр комплексы атыылаһыы былааннаналлар.

Саамай далааһыннаах тэрээһининэн 2016 сылга «Азия оҕолоро» Аан дойдутааҕы оонньуулары, 2017 сыллаахха Үөһээ Бүлүү сэлиэнньэтигэр XX-с Манчаары оонньууларын ыытыыга бэлэмнэнии чэрчитинэн эбийиэктэри тутуу буолаллар, диэн СР Президенин уонна Правительствотын Администрациятын Управлениета иһитиннэрэр.