Соторутааҕыта бу эстафета чэрчитинэн, ырыаҕа ылламмыт, хоһооҥҥо хоһуйуллубут Балыктаах сэлиэнньэтин айар талааннаахтара Хаптаҕай дьоһун мааны дьонугар ыалдьыттаатылар.

Балыктаахтар сүрдээх тэрээһиннэхтэрин, спорка, уус-уран самодеятельноска бэлэмнээхтэрин көрдөрдүлэр. Концерт балтараа чаас устата биир тыынынан, хас биирдии нүөмэр бэйэ-бэйэтиттэн ситимнэһэн чаҕылхайдык көрдөрүлүннэ, концерт тиэмэтэ, идеята толору арылынна.

Режиссер Валерия Михайлова хореограф идэлээх эрээри көрөөччүлэри соһутар, сонун хайысханы киллэрбитэ харахха быраҕыллар. Үҥкүү, фольклор коллектива, Дьулус Кычкин үҥкүүтэ, Лена Владимирова ырыата үрдүк сыанабылы ылыан ылла. Андрей Стручков солота, Антонина Иван Прибылыхтар, оскуола учууталларын литературнай ааҕыылара, хор биһирэннэ. Концерт уопсай баала 4,12 буолла.

Бу күннэргэ мэҥэ-хаҥаластарга эстафета былааҕа күөрэччи көтөҕүллэн салгыы атын нэһилиэктэринэн айанныыр.