Тэрээһин аһыллыытыгар СИА Россия үрдүнэн биллэриллибит Литература сылыгар аналлаах бырайыагын видеороликтара, нэһилиэк оҕолорун ортолоругар ыытыллыбыт Улуу Кыайыы 70 сылыгар анаммыт хоһоон күрэҕин кыайыылаахтарын ааҕыыта көрдөрүлүннүлэр.
Акцияҕа барыта 162 киһи кытынна. Ордук көхтөөхтүк оскуола коллектива — учууталлар, тех-үлэһиттэр, үөрэнээччилэр кытыннылар. Олохтоох библиотекаҕа нэһилиэк дьаһалтатын, «Түмсүү» Культура дьиэтин үлэһиттэрэ кэлэн кыттыыны ыллылар.
Акция Литература сылын чэрчитинэн, «Айхаллан, Улуу Кыайыыбыт!» девиһинэн ыытылынна. Ааҕааччылар бэйэлэрэ сөбүлүүр айымньыларын, сүүс бастыҥ айымньы испииһэгэр киирбит кинигэлэри, Улуу Кыайыыны уһансыбыт ветераннар тустарынан кинигэлэри, хаһыат матырыйаалларын көрдүлэр-аахтылар.
Аҕа дойду Улуу сэриитин фроннарыгар хорсуннук сэриилэспит, Днепр өрүһү туорааһыҥҥа уһулуччу хорсун быһыытын иһин Советскай Союз Геройа буолбут В.Д.Лонгинов, Нарев өрүһү туорааһыҥҥа геройдуу быһыыны көрдөрбүтүн иһин Россия Геройун аата иҥэриллибит М.М.Стрекаловскай олохторун, хорсун быһыыларын сырдатар матырыйааллар, кинигэлэр, хаартыскалар көрдөрүүгэ туруоруннулар. Маны таһынан «Ким да умнуллубат, туох да умнуллубат» диэн кинигэ быыстапката, олохтоох автордар айымньылара, «Сэрии хара холоруга» ветераннар тустарынан стендэ, альбомнар, буклеттар уурулуннулар. Сэрии, тыыл, үлэ фронун кыттыылаахтарын ааттарын үйэтитэн оҕолоро оҥорторбут планшеттара дьон-сэргэ болҕомтотун тарта.
Бу күн нэһилиэк олохтоохторо «Тэҥҥэ ааҕыы чааһа» акцияны күнүс 11 чаастан саҕалаатылар. Ол курдук акцияҕа оскуолаттан 95, оҕо саадыттан 17, балыыһаттан 6, олохтоох дьаһалтаттан 11, Культура дьиэтиттэн 5, интернаттан 4, почтаттан, ветеринарияттан биирдии ааҕааччы кытыннылар. Нэһилиэк баһылыга Василий Алексеев, тумуллар биир дойдулаахтара, Дьокуускай куораттан Айхал Габышев, Надежда Аржакова-Иванова кыттыстылар. Саамай кыра ааҕааччынан 3 саастаах Люба Новоприезжая буолла.
Тумул оҕолоро, оскуола үөрэнээччилэрэ «Чуораанчык» сурунаал ыыппыт «Кыайыы суолунан» акциятыгар ситиһиилээхтик кыттыбыттара. Ол акция түмүгүнэн 1 кылаас үөрэнээччилэрэ (кылаас салайааччыта Петрова В.П.) «Улуу Ильмень» композициянан кыттан Гран-прины ылбыттара, улууска үһүс миэстэ буолбуттара. Төрдүс кылаас үөрэнээччитэ Алина Васильева бэйэтэ суруйбут «Саллаат тыына» хоһоонун ааҕан биһирэбил бирииһинэн наҕараадаламмыта, детсад иитиллээччилэрэ Сэһэн Ардьакыап – Алексей Аржаков туһунан суруйааччы Н.А.Аржакова-Иванова хоһоонун доргуччу ааҕан көрөөччүлэр сэҥээриилэрин ылбыттара. Уус-Алдантан маҥнайгы народнай суруйааччы Иван Мигалкин тэрийбит «Төрөөбүт Мүрүм хатыҥ чараҥар» хоһоон күрэһэр 2 кылаас коллектива улууска иккис миэстэни ылбыта (кылаас салайааччыта Софронова Р.Е.), 3 кылаас үөрэнээччитэ Сардаана Аммосова (кылаас салайааччыта Алексеева Л.А.) улуустааҕы научнай-практическай конференцияҕа Чурапчы көһөрүүлээҕэ хос эбэтин туһунан дакылааты суруйан үһүс миэстэни ылбыта.
Муус устар 6 күнүгэр бастыҥ ааҕааччылар Улуу Кыайыы 70 сылынан, Литература сылынан СИА ыытар акциятыгар кыттыыны ылбыттара. Ол курдук, библиотекаҕа СИА редакцията кэлэн ыалдьыттаан, көрсүһэн барбыта. Сонуну тарҕатар агентство олохтоох библиотекаҕа Литература сылынан «SONI» DVD-проигрыватели уонна үлэһиттэр бэйэлэрин библиотекаларыттан кинигэ бэлэх туттарбыттара.
Комментарии
Авторизация на сайте через социальные сети