А.Сыромятникова бастакы кэпсээннэрэ, уочаркалара 1938 сыллаахха бэчээттэммиттэрэ. Айар үлэтин сүрүн тиэмэтинэн таһаарыылаах үлэ, оҕо саас, урукку уонна саҥа олоххо саха дьахтарын дьылҕата буолбуттара. 1951 сыллаахха Бүтүн Союзтааҕы оҕолорго аналлаах уус-уран кинигэ куонкуруһугар «Хопто» диэн оҕолорго аналлаах кэпсээннэрин хомуурунньуга бириэмийэнэн бэлиэтэммитэ. Кини 1957 сылтан ССРС Суруйааччыларын союһун чилиэнэ.
Анастасия Саввична уһун сылларга литератураҕа үлэтин суруналыыстыканы кытта дьүөрэлээбитэ - кинигэ кыһатыгар редакторынан, «Эдэр коммунист» хаһыакка отдел сэбиэдиссэйинэн үлэлээбитэ.
Суруйааччы бастакы бөдөҥ айымньыта - «Кыыс хотун» роман - 1970-1973 сс. бэчээттэммитэ. Анастасия Сыромятникова төрөөбүт литературатыгар саха дьахтарын дьылҕатын, кэскилин туһунан дьаныһан туран суруйбут киһинэн буолар.
“... А.С. Сыромятникова проза эйгэтигэр киириитэ кэлин үйэлэр кирбиилэригэр чаҕылхай көстүү буолбут дьахтар литературатын саҕаҕын арыйбыта. Ол курдук, билиҥҥи саха литературатын уратытын быһыытынан билиниллэр чуолаан аныгы саха суруйааччы дьахталлара – А.Е. Варламова-Айысхаана, Е. Слепцова-Куорсуннаах, Леди Муус уо.д.а. роман курдук уустук жанрга холонууларын “сэрэппитэ”, бэлэмнээбитэ. Литература гендернэй өрүтүн – дьахтар айар куолаһа имигэһин, намчытын, толкуйа уустугун, суруйар тыла-өһө ураты дириҥ ис хоһооннооҕун – кини айымньыларыттан саха ааҕааччыта тута итэҕэйбитэ”, - диэн литературовед, филологическай наука кандидата Саргылаана Ноева бэлиэтиир.
А.С.Сыромятникова үгүс сыратын айар ыччаты кытта үлэҕэ биэрбитэ, уһун сылларга «Хомус» литературнай холбоһугу салайбыта, онон саха литературатыгар солбугу иитиигэ улахан өҥөлөөх.
Анастасия Саввична айымньылаах үлэтэ мэтээллэринэн, грамоталарынан бэлиэтэммитэ. Кини СР культуратын үтүөлээх үлэһитэ.
1997 сыллаахха олохтон туораабыта.
Анастасия Сыромятникова төрөөбүтэ 100 сылыгар анаммыт үөрүүлээх мунньах б. дь. тохсунньу 27 күнүгэр Национальнай библиотекаҕа буолар.
Комментарии
Авторизация на сайте через социальные сети