Маннык сыаллаах-соруктаах рейдэҕэ куорат административнай хамыыһыйатын, «Якутдорстрой» ААО бэрэстэбиитэллэрэ, уо.д.а. хонтуруоллуур уорганнар үлэһиттэрэ кытыннылар. «Якутскэнерго» ААО бу тэрээһини көҕүлээтэ.

Хатыҥ Үрэххэ уонна куораты эргийэ барар суол быһа охсуһууларыгар баар «Строительнай» атыы-эргиэн утары баар массыына тохтуур сирин бэрэбиэркэлээтилэр. Улахан КАМАЗ уонна атын улахан техникалар бастайааннай турар сир оҥостубуттар. Манна оройуону бүтүннүтүн хааччыйар үрдүк күүрүүлээх линиялардаах тирэх турар. Быраабыла быһыытынан маннык тирэх анныгар массыына турара бобуллар.

Сарсыарда тохтобулга бобуу туһунан бэлиэни туруорбуттар. Оннук бэлиэ баарын да үрдүнэн, рейдэ кэлиитигэр уон улахан массыына турара. Инспектордар чугаһаан иһэллэрин көрөн массыыналар «куоппуттар» Ол да буоллар, биир киһи тохтобулга хаалбыт. Киниэхэ быраабыланы кэспитин туһунан боротокуолу туттарбыттар.

«Бэлиэҕэ ким да болҕомтотун уурбат, бэрээдэги тутуспат. Куораты эргийэ барар суолга икки сокуоннайа суох тохтобул баар. Тохтобулу бобор туһунан бэлиэлэри ити сирдэргэ барытыгар туруоруохпут. Маны барытын бэрэбиэркэлиир дьоҕус штаб тэрийиэхтээхпит. Ыам ыйын 25 күнүттэн ыла ыарахан ыйааһыннаах массыыналар Дьокуускай иһигэр сырыылара хаарчахтаныа», - диэтэ куорат баһылыгын бастакы солбуйааччы Андрей Николаев.

«6 киловольт линията алдьаммыта, ол иһин маннык көҕүлээһини оҥордубут. Бу харыстанар сиргэ 110 киловольтаах линия баар. Бары бииргэ түмсэммит баар кыһалҕаны туоратыахтаахпыт», - диир «Якутскэнерго» инженерэ  Алексей Березовскай.

Рейдэни ыыппыттарга федеральнай миграционнай сулууспа үлэһиттэрэ кытталлара наадалааҕын тэрийээччилэр эттилэр.