Онно быһаарыллыбытынан, бу дьыл тохсунньу 3 күнүгэр Чурапчытааҕы ООПТ 3 инспектордара уонна суоппар редовай биригээдэлэрэ бэйэлэрэ харыстыыр территорияларын көрө барбыттар.

Тохсунньу 5 күнүгэр суоппар В.Федоров бэйэтэ бас билэр «Буран» снегоходунан ООПТ диэки айаннаабыт. Ол эрээри хайысхатын бэйэтэ уларытан, кини биригээдэ атын чилиэннэригэр эппэккэ эрэ,«Саарба» ХЭТ бултуур сиригэр бэйэтин саатынан кулааһайы өлөрбүт.

ООПТ инспектордара А.Дьячковскай, С.Федоров уонна М.Николаев, итини билэн баран, сокуоннайа суох бултааһын суолун-ииһин бигэргэтиигэ, суоллааһыҥҥа туох да миэрэни ылбатахтар.

Тохсунньу 6 күнүгэр рейдэбэй биригээдэ бары чилиэннэрэ төрдүөн «Буранынан» дьиэлэригэр төннөн иһэн, Мырыла нэһилиэгин аттыгар кулааһай эттээх тутуллубуттар.

Үлэ силиэстийэтин түмүгүнэн үлэһиттэргэ хонтуруол уонна ирдэбил мөлтөҕүн иһин СР Айылҕатын харыстабылын миниистирин дьаһалынан СР айылҕатын харыстабылын дьайыытын хааччыйыы Сулууспатын салайааччытыгар И.Ивановка уонна биологическэй баай уонна ураты харыстанар айылҕа территорияларын Дирекциятын салайааччытыгар С.Тереховка быыгабар биэрдэ уонна буруйдаах дьону кытаанах ирдэбилгэ тардалларыгар сорудахтаата.

Айылҕа харыстабылыгар сөп түбэспэт сокуону кэһиилэрин иһин ити тэрилтэлэр дьаһалларынан суоппар Федоров уонна ООПТ инспектордара Дьячковскай, Николаев, Федоров үлэлэриттэн уһулуннулар.

Ыытыллыбыт үлэ силиэстийэтин түмүктэрэ СР ИДЬМ-ын органнарыгар ыытылыннылар, кинилэр холуобунай дьыаланы салгыы силиэстийэлии сылдьаллар.