Санкт-Петербург педиатрическай университетын, Иркутскай государственнай медицинскэй академиятын уонна республикатааҕы медицина киинин быраастара «Михаил Светлов» теплоходка эрдэттэн бэлэмнэммит испииһэгинэн дьону-сэргэни көрүөхтэрэ. Испииһэккэ харах, эндокринологическай, неврологическай, хирургическай, сүрэх-тымыр ыарыылаахтарга быраастар сүбэ-ама биэриэхтэрэ.

Оройуон киин балыыһаларыгар чопчу быһаарыллыбытах кардиологическай уонна эндокринологическай ыарыылаахтары көрүөхтэрэ-истиэхтэрэ.

Ыарыыны эрдэттэн сэрэтэр Дьокуускайдааҕы доруобуйа киинин быраастара оҕолорго скрининговай чинчийиини оҥоруохтара. Быраастарга сүбэлэтиэн баҕалаахтар төрөөбүттэрин туоһулуур докумуоннарын (пааспардарын), СНИЛС, медицинскэй полистарын илдьэ кэлиэхтээхтэр. Чинчийии босхо.

«Михаил Светлов» теплоход «Алроса-Нюрба» дьиэтин иннигэр тохтуоҕа. Ленин аатынан болуоссакка быраастар дьону кытта көрсүөхтэрэ, оҕолорго оонньуур площадка, аттракцион, хаартыскаҕа түһүү, хорчуоппа, о.д.а. тэриллэр. «Ньурба ыалдьыттары көрсөр» кэнсиэр, скандинавскай хаамыыга, ушуга, йогаҕа, тыыныы гимнастикатыгар, оҕуруонан, таҥас кырадаһынынан тигиигэ, быысапкаҕа, о.д.а. маастар-кылаастар буолуохтара. Киэһэ 22.00 чааска теплоход Ньурбаттан араҕыа.