«Острова» ТИА суруйарынан, миниистир салайааччылаах оробуочай бөлөх «Нерюнгритааҕы», Эльгатааҕы чох баайдаах сирдэргэ уонна «Мечел» ААО чааһынай инвестор үбүгэр-харчытыгар тутулулбут 321 км уһуннаах тимир суолга сылдьыбыт.

Уһук Илини сайыннаарыы миниистирэ эппитинэн, чох промышленноһын сайыннарыы тимир суолу уонна порт инфраструктуратын тутууну ыкса тутуллан ырытыллыбыт. Үрдүк квалификациялаах каадырынан хааччыллыы, саҥа баараҕай бырайыактары үбүлээһин, о.д.а болҕомто киинигэр турбут.

"Эльгатааҕы чох баайдаах сир саппааһынан да, чоҕун хаачыстыбатынан да аан дойдуга хатыламмат. Уустук ньуурдаах сиргэ тутуллбут тимир суолу көрдүбүт-иһиттибит. Уһук Илиҥҥэ чох салаата инникитин балысханнык сайдар кэскиллээх. Ол иһигэр АТР ырыынагар", - диэтэ Александр Галушка.

«Атын дойдуларга чох шахталара сабылла турар кэмнэригэр Россия кэлиҥҥи 6-7 сылга аан дойду ырыынагар күрэстэһэр бигэ кыахтаах.

Ол эрээри, тимир суолунан айан тарыыба, энергия, ноҕурууска үрдээһинэ күрэстэһэр кыаҕы мөлтөтөр", - диэтэ миниистир.

Оробуочай мунньах кэмигэр бизнес, министиэристибэлэр бэрэстэбиитэллэрэ инфраструктура, тимир суолунан айан тарыыбын, Эльга баайдаах сиргэ муниципальнай тэриллии, ону таһынан баараҕай бырайыактары сөптөөхтүк үбүлээһин тустарынан ырыттылар.