«Уһук Илин социальнай-экономическай туругун тэтимнээхтик сайыннарыы баһыйар үгүс өттүгэр Саха сирин кытта биир бигэ санааҕа кэллибит. Бүгүн, били, этэллэрин курдук, «чаһыбытын тэҥниибит» уонна инники хардыыбытын быһаарабыт», - диэтэ  Александр Галушка. 

Уруттаан иһэр сайдыы сирин-уотун площадкаларын министиэристибэ бэлэмниир. «Көҕүлээн киллэрбит 300 инвестиционнай бырайыактартан саамай кэскиллээҕи талламмыт өйүөхпүт. Итилэр ортолоругар Саха сиригэр олоххо киирэр бырайыактар бааллар», - диэтэ Галушка. 

Саха сирин баһылыгын эбээһинэһин быстах кэмҥэ толорооччу  Егор Борисов макрорегион сайдыытыгар Саха сирэ ылар оруолун туһунан санаатын үллэһиннэ: «Уһук Илини сайыннарыы министиэристибэтин кытта олох бары хайысхатыгар үлэлииргэ бэлэммит. Бүгүн этэр бырайыактарбыт быраап өттүнэн хааччыллыылаах буолуохтаахтар. Ол курдук, ити барыта сокуоннарга уонна тус сыаллаах федеральнай бырагыраамаларга тыктарыллыахтаах», - диэтэ кини. 

Брифинг кэмигэр Е.Борисов эппитинэн, Инаглинскайдааҕы, Эльгатааҕы чох баайдаах сирдэр уонна Нерюнгрига горнометаллургическай комбинаты тутуу болҕомто үөһүгэр турар.

Уруттаан сайдан иһэр сири-уоту быһаарыы монокуораттары сайыннарыыны кытта ыкса ситимнээх. Маннык эрдэлээн сайдан иһэр сир инникитин Нерюнгрига үөскэтиллиэ диэн бигэтик этиэххэ сөп.