Холбоһуктаах араб эмиратыгар Саха сирин промышленнай, туристическай кыаҕа көрдөрүллүбүтэ уонна хардарыта дьайсан бииргэ үлэлииргэ сөбүлэһиилэр түһэрсиллибиттэрэ, инникилээх, кэскиллээх сибээс олохтоммута.

Алмааска уонна бриллиаҥҥа арабтар ураты болҕомтолорун уурбуттар. Вице-президент Дмитрий Глушко брифиҥҥэ Саха сиригэр сэриитэ, айдаана-араллаана суох, суос-соҕотох сиргэ алмаас хостонорун бэлиэтээтэ. «Онон араб ювелирнай компаниялара ураты улахан болҕомтолорун ууруохтарын уурдулар», - диир кини. Кини этэригэр тирэҕирдэххэ, хас эмэ ый устата араб ювелирнай компаниялара, Дубайдааҕы алмаас биржата, ХАЭ-гар РФ бэрэстэбиитэлистибэтэ республикаҕа бу дойдуга АЛРОСА үлэтин хаттаан сөргүтэр туһунан этиилээх тахсыбыттар.

«Ити тула үлэ барда. "АЛРОСА" Dubai Multi Commodities Centre (DMCC) компанияны кытта офиһы үлэлэтэр туһунан сөбүлэһиигэ илии баттаатылар», - диэтэ вице-президент.

Арабтар республика сириттэн-уотуттан алмааһы, бриллианы атыылаһарга бэлэмнэрин биллэрбиттэр.

«"Аль Халидия Туризм" бөдөҥ туроператор Саха сиригэр балаҕан ыйыгар ыытыллар бриллиант нэдиэлэтигэр бастакы бөлөх дьону аҕалыа», - диэн суруналыыстарга эттэ предпринимательство дьыалаларын уонна туризм сайдыытын миниистирэ  Екатерина Кормилицына. 

Дмитрий Глушко базальт матырыйаалыттан үрдүк хаачыстыбалаах бородууксуйаны оҥорон таһаарыы уонна араб дойдуларыгар тиэрдии улахан кэскиллэниэҕин туһунан этэр. Форум түмүгүнэн араас сөбүлэһиилэр түһэрсиллибиттэр.

Дубайга сылдьан көрдөрбүт базальт матырыйаалын технологиятыгар Индия бөдөҥ компанията болҕомтотун хатаабыт.

Брифиҥҥэ көмүс үөскээбит сирдэрин дириҥник хайан дьүүллэспиттэрин вице-премьер бэлиэтиир.

«Азия оҕолоро оонньууга» ылбыт мэтээлинэн бу дойду олимпийскай кэмитиэтэ улаханнык киэн туттар эбит. Аныгыскы оонньууга элбэх кыттааччылаах улахан хамаанда күрэхтэһэ кэлэрэ күүтүллэр. Дубайга буобут мас-рестлинг болҕомто үөһүгэр буолла.

Эрдэ суруйбуппут курдук, республика президенэ форум бочуоттаах ыалдьытын быһыытынан сырытта. Форум аһыллыытыгар Егор Борисов дакылаат оҥорбута уонна пленарнай дьүүллэһиигэ быһаччы кыттыбыта.

Доруобуйа харыстабылыгар улахан хардыы оҥоһулунна. Ол курдук, Бахрейннааҕы «Рияда Груп» («Riyada Group») республика улуустарыгар фельдшердээх-акушердаах 100 пууну тутуохтара. Бу государственнай-чааһынай партнерство быһыытынан барыаҕын президент бэлиэтээтэ. Араб уонна Саха сирин култууралара майгыннаһарын форум кыттыылаахтара бэлиэтээтилэр.

Итини таһынан арабтар Дьокуускайга 100 миэстэлээх омук дойдуларын дьонун ирдэбиллэригэр сөп түбэһэр гостиницаны тутуохтара.