Саха сиригэр оҕону итиигэ, үөрэхтээһиҥҥэ, төрөөбүт тылга, культураҕа уонна өбүгэ үгэстэригэр сыһыаран сайыннарыы үлэтэ государственнай таһымҥа тэриллэр. Ордук кэнники сылларга дьон-сэргэ биирдиилэн да, бөлөҕүнэн да үгүс общественнай көҕүлээһиннэрэ өрөспүүбүлүкэ салалтатын өттүттэн ордук болҕомтоҕо ылыллар уонна балайда өйөнөр буолан иһэллэр. Дьон-сэргэ, ыччат бэйэтин баҕа өттүнэн тэрийэр хамсааһыннарын үгүс өттө кэскиллээх, төрөөбүт дойдубут, түөлбэбит сайдарыгар, дьон олоҕо-дьаһаҕа тупсарыгар туһуланар. Бу хамсааһыннары Саха Өрөспүүбүлүкэтин Ил Дархана, Ил Түмэн, Бырабыытылыстыба өйүүллэр.

Саха сирин оҕолорун общественнай тэрилтэлэрин түмсүүтүн көҕүлээһининэн 2001 сыллаахха оскуола оҕолоругар аналлаах сахалыы тыллаах КВН тэриллибиттэ. Ыччакка төрөөбүт сахабыт тылын умсулҕаныгар угуйар дьоһун соруктаах “Саха КВН” сонун, сэргэх, тэтимнээх оонньуулара сылтан сыл ыччат эйгэтигэр сыыйа киирэн, бу тэрилтэ улахан суолталаах общественнай хамсааһын быһыытынан сыллата кэҥээн, кыаҕыран иһэр.

“Саха КВН” 2009 сылтан бэйэтэ туспа Лига тэринэн, сыал-сорук туруорунан үлэлиир-хамсыыр. «Саха КВН» бүгүн оҕо-аймах, ыччат улаханнык сэҥээрэр оонньуу-күрэҕэр кубулуйда. Сахалыы КВН-ҥа кыттар оҕолортон кэнэҕэс сытыы, тобуллаҕас өйдөөх-санаалаах, сайдам тыллаах-өстөөх, төрөөбүт норуоттарын бастыҥ баайын иҥэринэ сылдьар үтүөкэн дьон үүнэн тахсыахтара.

Эдэр дьон! Үөрэххэ, үлэҕэ ситиһиилээх, саҥаны-сонуну айарга-тутарга бэлэм, төрүт, ыллыктаах өйдөөх-санаалаах дьон буолуҥ!

 Александр Жирков,

Саха Өрөспүүбүлүкэтин Ил Түмэнин Бэрэссэдээтэлэ,

Саха Өрөспүүбүлүкэтин “Саха КВН Лигата” ыччат общественнай тэрилтэтин бочуоттаах президенэ