Ямалга агропромышленнай комплекс сайдыытытн бүтүннүүтүн туһунан АПК департаменын дириэктэрэ Вячеслав Кучеренко билиһиннэрдэ. Оттон Саха сиригэр үгэскэ кубулуйбут салаалар тустарынан тыа хаһаайыстыбатын уонна ас-үөл политикатын миниистирин солбуйааччы  Иван Павлов кэпсээтэ. Хоту сир аҕыйах ахсааннаах төрүт омуктарын дьыалаларыгар департамент дириэктэрин солбуйааччы Эдуард Яунгад уонна СР Государственнай Мунньаҕын (Ил Түмэн) депутатаАлександр Слепцов Ямалга уонна Саха сиригэр үгэс буолбут салаалары өйүүр регионнааҕы сокуоннары ырыттылар.

СР правительствотын председателин солбуйааччы Петр Алексеев Россия бу икки субъега олорор, айылҕатын, климатын усулуобуйалара, экономикатын тутула майгыннаһалларын туһунан суруналыыстарга санаатын үллэһиннэ. Бу икки регион хардарыта дьайсан сайдаллара кэскиллээҕин туһунан кини эттэ. «Госдумаҕа өрдөөҥҥүтэ киирбит «Табаны иитии» туһунан федеральнай сокуон ылылларыгар санаабытын, кыахпытын түмэрбит буоллар — диэтэ кини. - Бүгүҥҥү Ямал табаны иитиигэ аан дойду сүрүн киинэ буолар. Табаттан бородууксуйаны оҥорон таһаарарга бырайыактары олоххо киллэрэргэ биһиги биир санаанан салайтаран үлэлиирбит буоллар.

Александр Мажаров бэлиэтииринэн, Ямал Саха сирин кытта хардарыта үлэлээбитэ 50-тан тахса сыл буолбут. Ол былаһын тухары чопчу уонна чуолкай дьыалабыай сыһыан үөскээбит. Арктика усулуобуйатыгар олорор Ямал уонна Саха сирэ араас таһымҥа туруулаһар боппуруостара куруук майгыннаһаллар, биирдиҥилэр. Кини үгэскэ кубулуйбут хаһаайыннааһыҥҥа туһаайыллыбыт экономическай боппуруостар туохтааҕар да ордук интэриэһиргэтэллэрин эттэ. Холобур, кинилэр регионнара таба үгүөрү тириититтэн тугу гыныан билбэт. Оттон Саха сиригэр тириини таҥастыыр производство баар эрээри, таба ахсаана аҕыйаҕынан, бу кыылы өлөрүү бобуулаах. Хотугу муора суолун сөргүтүү өттүттэн көрдөххө, Ямал уонна Саха сирэ муоралаах сирдээхтэр-уоттаахтар. Ити курдук кини сайдыыга олугу уурар суол боппуруоһун эмиэ көтөхтө. Саха сиригэр суол, тимир суол эмиэ сытыытык турарын бары да билэбит. «Майгыннаһар өрүппүт элбэҕинэн хайаатар да бэйэ-бэйэбитин кытта хардарыта дьайсан, сүбэлэһэн-амалаһан үлэлээтэхпитинэ, үлэбит көдьүүһэ хас эмэ бүк улахан буолуох этэ», - диэтэ кини.

Саха сириттэн тиийбит делегация «Салехардский комбинат» балыгы астыыр тэрилтэҕэ, хотугу табаны астыыр сыахха, о.д.а. тэрилтэлэргэ сырыттылар, араас тэрээһиннэргэ кытыннылар.