Дмитрий Глушко сырыытыттан үчүгэй өйдөбүллээх хаалла. «Эдэр дьон үөрэнэр усулуобуйалара толору баар. Ону сэргэ үөрэнэр корпус таас дьиэтэ улуускут киинин олус киэргэтэр эбит», - диэн аһаҕастык билиннэ.

Улуус дьаһалтатын аактабай саалатыгар миниистир нэһилиэк баһылыктарын, управление салайааччыларын уонна улуустааҕы Кыайыы 70 сылын тэрийэн ыытар хамыыһыйа чилиэннэрин кытары көрүстэ.

Кини Сунтаарга сыһыаннаах кэккэ боппуруостарга тохтоон ааста. Ол курдук, СТК базатыгар суоппардары бэлэмнээһин уруккуттан барар. Ону баара билигин манна кэккэ ыарахаттар үөскээбиттэр. Сүрүн биричиинэнэн олохтоох автодром бетонунан бүрүллүбэтэҕэ буолар. Манна киирбит саҥа быраабылалар этэллэринэн, бары автодромнар бетон биитэр асфальт бүрүөһүннээх буолуохтаахтар. Сунтаарга буоллаҕына хара буорунан көрөн сытар. Тустаах министерство бу боппуруоска көмөлөһүөн сөп эбит.

Бу аҕыйах сыллаахха диэри Сунтаар улууһугар Бүлүү эҥэр улуустарын үөрэнээччилэрин ортотугар араас предметнэй олимпиадалар ыытыллар этилэр. Хомойуох иһин, билигин оннук олимпиадалар атын ыаллыы сытар улуустарга буолаллар. Дмитрий Евгеньевич манна сыһыаннаан чопчу этиилээх буолла. Ол курдук, Сунтаар биир кэмҥэ 400-500 оҕону көрсөн, тустаах тэрээһини ыытыаҕын сөп буоллаҕына, мантан инньэ предметнэй олимпиадалар манна ыытыллар буолуохтара. Ону кытта улуус баһылыга Анатолий Григорьев сөбүлэһэрин биллэрдэ.

Мантан Сунтаар сүүйүүлээх буолар. Олимпиадаҕа бастаабыт оҕолор республика, киин куорат үрдүк үөрэҕин кыһаларыгар тургутан көрүүтэ суох быһа киирэр толору кыахтаналлар.

Өссө миниистир олохтоох технологическай колледж базатыгар ДьУоКХ салаатыгар үлэлиир кыахтаах специалистары үөрэтэн таһаараргыт буоллар диэн сүбэлээтэ. Түмүгэр кини республика үтүмэнник сайда турарынан, нефть, гаас промышленноһа кэҥииринэн, эдэр дьон манна сыһыаннаах идэлэри талан, соҕуруу баар үрдүк үөрэх кыһаларыгар киирэн үөрэнэллэригэр баҕарарын эттэ.

Көрсүһүү түмүгэр СӨ анал үөрэхтээһиҥҥэ, кадрдары бэлэмнээһиҥҥэ, аттаран туруорууга миниистирэ Д.Е.Глушко уонна «Сунтаар улууһа (оройуона)» МО баһылыга А.В.Григорьев бииргэ үлэлэһии туһунан сөбүлэһиигэ илии баттаатылар.