СӨ Идэлээх сойуустарын федерациятын бэрэссэдээтэлэ Николай Дегтярев улуус киинигэр идэлээх сойуустар актыыптарын кытта көрүстэ. 2015 с.олунньу 7-9 күннэригэр. Сочи куоракка буолбут Арассыыйа тутулуга суох Идэлээх сойуустарын федерациятын IХ cъеһин үлэтин, идэлээх сойуус үлэтин көдьүүһүн үрдэтии аныгы ньымаларын, актыыпка миитиннэри, демонстрациялары, сэлэлээн хаамсыыны, забастовкалары ыытыы бэрээдэгин тустарынан кэпсээтэ, кэлэктиибинэй дуогабары оҥорууга, производствоҕа оһолу силиэстийэлээһиҥҥэ, үлэһиттэр бырааптарын көмүскээһиҥҥэ, тэрилтэҕэ үлэһиттэр ахсааннарын сарбыйыы бэрээдэгэр о.д.а. сүбэлэри биэрдэ.

Семинарга улуус баһылыга Игнатий Спиридонов тыл эттэ. Кини үлэһиттэр бырааптарын көмүскээһиҥҥэ идэлээх сойуустары кытта бииргэ үлэлииргэ эрэннэрдэ. Ону бигэргэтэн СӨ Идэлээх сойуустарын федерациятын уонна «Кэбээйи улууһа» МТ икки ардыларыгар сөбүлэһиигэ илии баттаатылар.

Семинарга улуус судаарыстыбаннай тэрилтэлэрин үлэһиттэрин идэлээх сойуустарын бэрэссэдээтэлэ Юлия Петрова уонна Кэбээйи улууһун идэлээх сойуустарын тэрилтэлэрин сүрүннүүр сэбиэт бэрэссэдээтэлэ Ирина Иванова тыл эттилэр.

Идэлээх сойуус актыыбыгар өрөспүүбүлүкэ Идэлээх сойууһун федерациятын эппиэттээх үлэһиттэрэ Леонид Дырахов, Виктор Ишниязов, Олег Кузнецов туһалаах сүбэлэри биэрдилэр,семинар кыттыылаахтарын боппуруостарыгар эппиэттээтилэр.

Николай Николаевич бэйэтин этиитигэр Арассыыйа Бырабыыталыстыбата судаарыстыбаннай уонна гражданскай сулууспалаахтар хамнастарын үрдэтиини тохтотор туһунан быһаарыы ылыммытын уонна муниципальнай сулууспалаахтары ити эмиэ күүтэрин бэлиэтээтэ. Арассыыйа Бырабыыталыстыбата уонна Арассыыйа тутулуга суох Идэлээх сойуустарын федерацията 2015 балаҕан ыйын 1 күнүгэр бюджет эйгэтин үлэһиттэрин хамнаһын 5,5 быраһыан үрдэтэр туһунан дуогабардаспыттар.

Семинар түмүгэр Н.Н. Дегтярев СӨ Идэлээх сойуустарын федерациятын бочуотунай грамоталарын Андрей Ибрагимовка (баһаарынай сулууспа), Александра Ивановаҕа (оройуоннааҕы киин балыыһа), Антонина Апросимоваҕа (үп-казначейство управлениета) туттарда.