Россия Наукатын бэлиэтиир үөрүүлээх тэрээһиҥҥэ «Нам улууһа» МТ баһылыга Александр Атласов уонна Чурапчытааҕы аграрнай техникум дириэктэрэ Андрей Попов ДьГТХА-тын кытта бииргэ үлэлиир, сибээһи олохтуур туһунан сөбүлэһиигэ Леонид Владимировы кытта илии баттастылар.

Нам улууһун баһылыга Александр Павлович Сөбүлэһии туһунан бу курдук этэр: «Улуус дьаһалтата Дьокуускайдааҕы государственнай тыа хаһаайыстыбатын академиятын кытта хардарыта үлэлэһиигэ хас да пууннаах сөбүлэһии түһэристэ. Онно олоҕуран биһиги студеннары улуус тэрилтэлэригэр, дьаһалта уорганнарыгар үөрэтиини уонна производственнай практикаларын ааһалларыгар, Академия күннэрин бэлиэтээһиҥҥэ, научнай-чинчийэр, үөрэтэр-иитэр үлэлэригэр, култуурунай-маассабай тэрээһиннэри ыытыыга, улуус сиригэр-уотугар студенческай этэрээттэр саҥа объектары тутууга уонна капитальнай өрөмүөҥҥэ үлэлииллэрин тэрийиигэ, выпускниктары үлэ миэстэтинэн хааччыйыыга көмөлөһүөхпүт. Оттон академия улууһу кадрдарынан хааччыйыахтаах уонна үрдүк квалификациялаах үлэһиттэри бэлэмнээһиҥҥэ тус сыаллаах үлэни ыытыахтаах, оскуоланы бүтэрээччилэргэ уонна үрдүкү кылаас үөрэнээччилэригэр идэҕэ туһаайар уонна иһитиннэрэр-сырдатар үлэни тэрийиэхтээх, Модут уонна 2 Хомустаах агро-оскуолаларын кытта бииргэ үлэлэһиэҕэ, выпускниктарга үөрэх салааларыгар биирдии анал миэстэнэн хааччыйыахтаах, специалистар, тэрилтэ үлэһиттэрэ квалификацияларын үрдэтиигэ уонна эбии профессиональнай үөрэхтээһиҥҥэ курстарын тэрийиэхтээх. буолар. Бу бииргэ үлэлэһии бары хайысхалара тыа сирэ уонна нэһилиэнньэ олоҕо-дьаһаҕа сайдарыгар сүрүн олук буолуохтара диэн бигэ эрэллээхпит».