Улуус социальнай-экономическай сайдыытыгар анаммыт кэккэ тэрээһиннэр сөбүлэһиигэ киирдилэр. Улуус сиригэр-уотугар инновационнай, научнай-техническэй саҕалааһыннары көҕүлүөхтэрэ, ону таһынан геологоразедка үлэтигэр табыгастаах усулуобуйа тэриллиэҕэ.

«Илиҥҥи газ бырагырааматын олоххо киллэрии чэрчитинэн Кэбээйи улууһун Соболоох-Ньидьили баайдаах сир ситэри чинчийиллиэхтээх. 2014-2015 сылларга сейсразведка ыытыллыаҕа, оттон 2017 сылга чинчийэр сыаллаахтык сири дьөлө хаһыы үлэтэ саҕаланыа», – диэтэ «Газпром геологоразведка» ХЭТ генеральнай дириэктэрэ Алексей Давыдов.

«Бииргэ уонна хардарыта дьайсан үлэлээһин улуус сайдыытыгар бигэ олугу ууруо, Социальнай уонна оҥорон таһаарыы бырайыактарын олоххо киллэрэрбитигэр компания көмөтө улахан буолуо», – диэтэ Кэбээйи улууһун баһылыга Игнатий Спиридонов.

Ыспыраапка:

«Газпром геологоразведка» ХЭТ — 100 бырыһыан «Газпром» ААО тэрилтэтэ. Компания баайдаах уонна углеводородттаах сири булар уонна чинчийэр сыаллаах-соруктаах үлэлиир, «Газпром» минеральнай-сырьевой базатын хаҥатыы компания үлэтин сүрүн сыалыгар киирэр.