«Намтан, Уус-Алдантан, Тааттаттан, Чурапчыттан, Амматтан, Алдантан, Мэҥэ-Хаҥаластан, Хаҥаластан, Дьокуускайтан бу ырыа түһүлгэтигэр 200-чэ киһи кытта кэллэ», - диэн СИА-ҕа эттэ тэрийэр кэмитиэт чилиэнэ Саргылана Адамова. 

С.Адамова эппитинэн, Валерий Ноев сырдык кэриэһигэр анаммыт Ыһыах быйыл бэһис төгүлүн ыытыллан кини 75 сааһыгар ананна. Ат сүүрдүүтэ, оһуохай, сахалыы таҥас, о.д.а. куонкурустар үрдүк таһымнаахтык ыытыллыбыттар. Ансамбыллар, ырыаһыттар күүскэ бэлэмнэн кэлбиттэрин жюри бэлиэтээтэ. Кыттааччылар бука бары кыайыы иһин чиэһинэйдик киирсибиттэр. «Ансамбылларга Гран-при суумата 40 тыһ. солк., оттон биирдиилээн ырыаһыттарга 30 тыһ. солк.», - диэтэ кини. 

Валерий Васильевич ырыаларын диискэтин, музыкатын нотатын хомуурунньугун сүрэхтэниитэ — быйылгы Ыһыах уратыта. С.А. Зверев - Кыыл Уолун аатынан үҥкүү театрын оркестыра быйылгы Ыһыах ыырыылаах ыалдьыта буолла.

Саха сирин музыкатын эргимтэтигэр биллэр-көстөр, ааттаах-суоллаах Сергей Попов, Виталий Андросов, Владимир Индигирский, Чаянда Скрыбыкина, Евдокия Иванова уо.д.а ырыаны толорууну сыаналаатылар. 

Мэҥэ-Хаҥалас Төҥүлүтүттэн кыттыбыт Терентий Егоров муҥутуур кыайыылааҕынан таҕыста. Хорга Мэҥэ-Хаҥалас Бэдьимэтин эр дьон «Күрүлгэн» ансаамбыла тэҥнээҕин булбата.

Үбүлүөй тэрээһинин чэрчитинэн өссө үс республикатааҕы куонкуруһу былаанныыллар. Мэҥэ-Хаҥалас Павловскайыгар алтынньы 4 күнүгэр норуот интсруменнарын оркестырдара күрэстэһиэхтэрэ. Валерий Ноев ырыаларыгар куонкурус Амма Алтаныгар балаҕан ыйын 12 күнүгэр ыытыллыаҕа. Ону таһынан өйдөбүнньүк бүүһү туруоруохтара, өйдөбүнньүк киэһэлэр, араас кэмҥэ бу куонкуруска кыайбыттар кэнсиэрдэрэ, о.д.а. тэрээһиннэр буолуохтара.