Тэрээһиҥҥэ Дьокуускайдааҕы кадеттар оскуолаларын курсаннара ыалдьыттаатылар, биир кэккэнэн хааман, ыллаан уонна ыстыыктаах бинтиэпкэнэн араас хамсаныылары оҥорон көрдөрдүлэр.

Куоталаһыы түмүгүнэн сахалартан бастакы Советскай Союз Геройа Ф.К.Попов аатынан Баатара оскуолатын кадет кылааһын уолаттара үчүгэй бэлэмнээхтэрин көрдөрөн кыайыылааҕынан ааттаннылар (салайааччы Н.М.Семенов). Иккис миэстэ Майатааҕы лицей (Г.П.Хабаров) уонна үһүс миэстэни Наахара орто оскуолатын (П.В.Васильев) үөрэнээччилэрэ ылан кубоктарынан, грамоталарынан, мэтээллэринэн наҕараадаланнылар. Итиэннэ аны саас Кыайыы параадыгар кыттар чиэстэннилэр.

«Бастыҥ хамандыыр» ааты Баатараттан Влад Тарабукин сүктэ. В.П.Ларионов аатынан Майа орто оскуолатын хамаандата (Г.А.Харлампьев) «Саамай түмсүүлээх хамаанда», Балыктаах үөрэнээччилэрэ «Кыайыыга дьулуур иһин» (Е.Е.Шишигин) анал бириис хаһаайыттарынан буоллулар.

Киэһэтин «Кыталык» кииҥҥэ ансаамбыл салайааччыта Василий Винокуров көҕүлээһининэн Дьокуускайдааҕы кадеттар оскуолаларын курсаннара уонна Баатара оскуолатын кадеттара кыттыылаах аан бастакы «Кадеттыы баалы» бэлэхтээтилэр.

Баатара кадеттара вальс араас үҥкүүлэрин үөрэтэн кэлэн үҥкүү түһүлгэтин тэрийдилэр. Үҥкүүгэ өр сылларга оҕону байыаннай-патриотическай иитиигэ үлэлээбит отставкаҕа тахсыбыт майор, «Россия патриота» бэлиэ хаһаайына Дмитрий Стручков Мотрена Игнатьевалыын вальстаан баалы киэргэттилэр. Дьокуускайтан кадеттар эмиэ бэйэлэрин баһылаабыт хамсаныыларын көрдөрдүлэр, республикатааҕы куонкурустар лауреаттара Евгений Оленов, Рамиль Горохов ырыа бэлэхтээтилэр.

Ыччаты байыаннай иитиигэ кылааттарын киллэрсибит Василий Винокуровка уонна Анатолий Чичаховка Махтал суруктар туттарылыннылар. Дьоро киэһэни «Кыталык» үҥкүү бөлөҕүн уолаттара үҥкүүнэн киэргэттилэр.