"Биһиги сүрүн баайбыт — дьоммут-сэргэбит. Биһиги дьоммут маннык уустук усулуобуйаҕа олороругар, өрө тахсыылаахтык үлэлииригэр, айарыгар, тутарыгар киһи аймах махтаныах тустаах. Биһиги республикабыт норуоттара атын ханна да атыллыыта суох, хатыламмат уонна ураты культуралаах", - диэтэ Егор Афанасьевич.

Аан дойду хоту сиригэр Саха сирэ сүөһүнү, сылгыны иитэр, килиэби үүннэрэр соҕотох регион буоларын  кини чиҥэтэн эттэ.

"Мин норуотум культуратын, үгэһин, абыычайын төрүттэрин харыстаан илдьэ сылдьарыттан киэн туттабын. Аныгы кэмҥэ глобализация олоххо хабырдык уонна дьулурҕатык киирэр. Ити содула, куттала улахан", - диэтэ Егор Афанасьевич. Ити кыһалҕа туһунан Гетачью Энгиданы кытта ырытыһыыга төрөөбүт тылы, кульураны уонна үгэһи харыстааһын уонна үрдүктүк тутуу эрэ глобализация содулуттан быыһыыр кыахтааҕын кини чиҥэтэн эттэ.

Кини Гетачью Энгида «Языковое и культурное разнообразие в киберпространстве» норуоттар икки ардыларынааҕы конференцияны үһүс төгүлүн Дьокуускайга тэрийэн ыытарыгар махтанна.

Быйыл муус устарга Егор Борисов Москваҕа ЮНЕСКО генеральнай дириэктэрин Ирина Бокованы кытта көрсүбүтэ. Онно Саха сирэ уонна ЮНЕСКО хардарыта үлэлиир иккис коммюникеларын түһэрсибиттэрэ.

Ирина Бокова уонна Егор Борисов хардарыта бииргэ үлэлээһини эргиччи ырыппыттара, онно Саха сирин идэлээх дьонун ЮНЕСКО штаб-квартиратыгар, араас салааларыгар стажеровкаҕа ыытар туһунан дьүүллэспиттэрин таарыччы эбэн этиэххэ сөп.

Егор Афанасьевич аны икки сылынан ыытыллыахтаах норуоттар икки ардыларынааҕы «Азия оҕолоро» VI-с спортивнай оонньууларга ЮНЕСКО бэйэтин кынатын анныгар ылан, патронат буоларыгар эппитин  ЮНЕСКО генеральнай дириэктэрин солбуйааччы болҕомтотугар ылла.

Тэрээһиҥҥэ СР бырабыыталыстыбатын вице-премьерэ Феодосия Габышева, М.К.Аммосов аатынан ХИФУ ректора Евгения Михайлова,  уо.д.а. кыттыннылар.