Саахал түмүгэр олохтон туораабыт дьон аймахтарыгар, чугас дьонноругар курутуйуу, кутурҕан тылларын Саха Республикатын салалтатын аатыттан тырааныспар уонна суол хаһаайыстыбатын миниистирэ Семен Винокуров тиэртэ. Кини Саха сирин салалтата уонна дьоно-сэргэтэ кинилэр иэдээннэрин тэҥҥэ үллэстэллэрин, кинилэр тустарынан сырдык өйдөбүл сүрэххэ, дууһаҕа куруук тыыннааҕын туһунан эттэ. Семен Викторович Усуйаана улууһун, Казачье уонна Усуйаана социальнай-экономическай өттүнэн уонна тырааныспыра сайдарыгар ураты болҕомто ууруллуоҕун бэлиэтээтэ.

Государственнай Мунньах (Ил Түмэн) аатыттан кутурҕан тылларын норуот депутата Александр Слепцов тиэртэ. Кини Уус-Куйгааттан Казачье бөһүөлэгэр диэри массыына сылы быһа сылдьар суола тутуллуоҕун, дьоҕус авиация сайдара болҕомтоҕо ылылларын туһунан эттэ.

СР муниципальнай тэриллиилэрин сэбиэтин толорооччу дириэктэрин солбуйааччы, уруккуту Усуйаана улууһун баһылыга  Софрон Слепцов Ми-8 катастрофатыгар респуликаҕа бэс ыйын 22 күнүттэн саҕалаан ыытыллар тэрээһиннэр тустарынан кэпсээтэ. Ол курдук, Дьокуускайга аһымал кэнсиэртэн киирбит үп-харчы сырдык тыыннара быстыбыт дьон аймахтарыгар көмө быһыытынан бэриллибитигэр тохтоото.

Миитиҥҥэ СР үлэҕэ, социальнай сайдыыга миниистири солбуйааччы Оксана Винокурова уонна Усуйаана улууһун баһылыгын солбуйааччы  Артем Милютин тыл эттилэр.

Казачье олохтоохторун аатыттан тылы ылбыт бэтэрээннэр сэбиэттэрин бэрэссэдээтэлэ Ирина Гуляева республика салалтата оройуон ыраах, кытыы сытар нэһилиэктэригэр сытыырхайан, уустугуран турар тырааныспар боппуруоһун быһааралларыгар, пассажирдарга куттал суох буолуутун хааччыйарга уонна саахалы силиэстийэлиир үлэ тиһэҕэр диэри тиэрдиллээхтээҕин ыйда.

Республика салалтата быһылаан кэнниттэн уонна быйыл көмөлөспүтүн олохторо быстыбыт дьон аймахтара эттилэр. Кинилэргэ 27 мөл. 400 тыһ.солк. кээмэйдээх көмөнү республика бырабыыталыстыбата оҥорбута.

Казачье бөһүөлэгин баһылыга  Егор Томскай  бырабыыталыстыба Усуйаанаҕа, Казачьеҕа уонна Юкагир нэһилиэктэригэр сылдьарга анаан «Хищник» вездеходтары, тырааныспар уонна суол хаһаайыстыбатын министиэристибэтэ икки 12 миэстэлээх катеры атыылаһарга үбү-харчыны биэрбитин, «Уус-Куйгаа – Казачье» хайысханан суолга үлэ ыытылларын, «Уус-Куйгаа – Севернэй — Казачье» хайысхаларынан сылы эргиччи үлэлиир суолу оҥоруу былааннанарын, о.д.а. тустарынан билиһиннэрдэ.