Ленин проспегын 53, Ленин проспегын 53/3, Бестужев-Марлинскай аат. уул.44, Шавкунов аат. уул. 78, Байкалов аат. уул. 59, 17 кыбаартал... Хомойуох иһин, аадырыстары субу курдук тохтоло суох этэ, ааттыы туруохха сөп. Бу — саахалланар кутталлаах, көтүрүллүөхтээх дьиэлэр. Куораппыт саамай килбэйэр киинигэр - Ленин проспегын 53 уонна 53/3 турар дьиэлэр 1905 сыллаах тутуулар. Манна билигин да дьон олорорго күһэллэрин итэҕэйиэххэ уустук. Бу дьиэлэртэн биирдэстэригэр түөрт оҕолоох Алексеевтар дьиэ кэргэн бааллар.

 Мунньахха эппиттэринэн, саахаланар кутталаах дьиэ ахсаана куруук этиллэрдээҕэр хас эмэ бүк элбэх. Маннык дьиэлэргэ биир үксүн нэһилэнньэ кыаммат араҥата олорор. Кинилэр дьиэлэрэ хаарбаҕын, саахаланар кутталааҕын туоһулуур докумуоннары хомуйсаллара уустук. Аны докумуону оҥотторуу сыаната муҥутуур үрдүк. Ити туохтан төрүөттэнэн үөскэтиллибитэ биллибэт.

«Дьон бэйэтин быраабын билбэтиттэн, элбэх мэһэй-харгыс баарыттан сылтаан дьиэлэрэ итиннигинэн билиниллибэт», - дииллэр манан анаан дьарыктанар дьон.

Мунньахха кэпсэтиһии сүрүн сүнньэ элбэх оҕолоох Алексеевтарга иэҕилиннэ. Онно сыһыаннаан Дьокуускай куорат элбэх оҕолоох дьиэ кэргэн сойууһун бэрэссэдээтэлэ Римма Горохова олорор дьиэ кыһалҕатын сир учаастага быһаарар кыахтааҕан чиҥэтэн эттэ. Онтон салгыы кини элбэх оҕолоохторго уота да, суола да, о.д.а инфраструктурата суох ыраас хонууга сир бэриллибитин эттэ.

Бэтэрээннэр республикатааҕы сэбиэттэрин салайааччыта Будимир Слепцов киин куоракка эрэ буолбакка, тыа сирдэригэр, ордук хоту улуустарга болҕомто күүһүрүөхтээҕэр ыҥырда.