Кэлбит cүөһүлэри Төхтүртэн чугас баар Долоон диэн сиргэ тутуохтара. Хаһаайыстыба бу сүөһүлэри лизинг бырагырааматынан биэс сылга болдьохтоон төлүүр. Хаһаайыстыба салайааччыта Андрей Холмогоров бу туһунан кэпсээтэ.

- Калмыкия Адучинскай оройуонугар «Агрофирма «Адуч» племенной собутуттан сүөһүлэри атыыластыбыт. Колмыкияҕа тиийэммит, технологияны көрөн-истэн баран атыыланар сүөһүлэртэн 9 оҕуһу, онтон атына эдэр ынахтары талан ыллыбыт. Олунньуга, кулун тутарга бастакы төрүөҕү ылыахпыт.

Биллэн турар, маныаха эдэттэн бэлэмнэммиппит. Былырыын маннык сүөһүлэри ылбыт Хаҥалас, Үөһээ-Бүлүү улуустарыгар тиийэн, сүөһүлэри, кинилэр хайдах аһыылларын, көрүү-харайыы уратытын иҥэн-тоҥон билсибиппит.

Долоон диэн сиргэ 120 сүөһү киирэр комплексы туппуппут. Мэҥэ-Хаҥалас тыа хаһаайыстыбатын управлениетын кытта уоту тардыбыппыт. Онно 1 мөл. 800 тыһ.солк. төлөөбүппүт. Бүгүҥҥү туругунан 200 тонна оту бэлэмнээтибит. Былааммыт — 500 тонна от.

Калмыкияттан ыла сүөһү 15 хонук айаннаата. Айан кэмигэр ыйааһыннара кыратык аччаата.

Калмык боруодалаах сүөһү этэ саха гиэнигэр чугас. Эти уонна эт бородууксуйаны атыылыырга күүрүүлээхтик үлэлиэхпит.

 Тыа хаһаайыстыбатын, ас-үөл политикатын министиэристибэтин салалтатынан үлэлиир сүөһүнү иитии департаменын салайааччытын э.т.  Галина Осипова эппитинэн, өрөспүүбүлүкэҕэ бүгүҥҥү туругунан 1 тыһ. 300 тахса эрэ саха боруодалаах сүөһү баар. «Аһара аҕыйах хаалбыттарынан, эккэ туттар сөбө суох. Саха боруодалаах сүөһү ахсаанын элбэтэр сорук турар», - диэтэ кини.

Кини бэлиэтииринэн, биһиги уонна калмык сүөһүлэрэ турано-монгольскай биир төрүттээхтэр. Кинилэр тыйыс тымныыны тулуйар уратылаахтар. Тыыннаах ыйааһыны түргэнник эбинэллэр. Ынахтар 10-15 сыл устата төрүөҕү биэрэллэр. Бу боруода сүөһүлэр 18 ыйдарыгар 465-480 кг диэри тиийэ ыйааһыннаналлар. Ситтэхтэринэ-хоттохторуна 220-245 кг тиийэ эти биэрэр кыахтаахтар.