Улуу Кыайыы Знамятын Анаабыртан Дьокуускайга аҕаллылар

Ыам ыйын 1 күнүгэр Анаабыр уонна Өлөөн улуустар быысаһар сирдэригэр — Куонаапкаҕа Өлөөн Дьэлиҥдэ нэһилиэгин баһылыга Семенов Н.С. үөрүүлээх быһыыга-майгыга Улуу Кыайыы Знамятын Анаабыр дэлэгээссийэтигэр туттарда.

Ыаллыы улуус дэлэгээссийэтин Анаабыр улууһун баһылыгын бастакы солбуйааччы Зедгенидзев В.В. салайааччылаах бөлөх көрүстэ. Улуу Кыайыы кытыастар кыһыл Знамята Анаабыр чэбдик салгыныгар тэлибирии оонньоото.

Үөрүүлээх түгэҥҥэ мустубут дьону Дьэлиҥдэ нэһилиэгин баһылыга Семенов Н.С. уонна улуус баһылыгын бастакы солбуйааччы Зедгенидзев В.В. эҕэрдэлээтилэр.
- Улуу Кыайыы үбүлүөйдээх 70 сылын бэлиэтиир сүдү бырааһынньык буолара аҕыйах күн хаалла. Дьэлиҥдэҕэ Кыайыы Знамята муус устар 30 күнүгэр улуус кииниттэн кэлбитэ. Эдэр ыччакка патриотическай өйү-санааны иҥэрэн, бүгүн Кыайыы Знамятын Анаабыр улууһугар туттарыыны быйыл армияттан кэлбит икки уолбутугар сүктэрдибит. Уонна «Долбор» оҕо үҥкүү ансаамбылбыт Сааскылаах уонна Үрүҥ Хайа нэһилиэктэригэр ыалдьыттыаҕа, - диэтэ Дьэлиҥдэ нэһилиэгин баһылыга.
Улуус баһылыгын бастакы солбуйааччы В.В. Зедгенидзев: «Бүгүн биһиги улууспутугар историческай бэлиэ түгэн. Улуу Кыайыы Знамятын эстафетатын түмүктүүр түһүмэххэ Дьэлиҥдэ нэһилиэгин дэлэгээссийэтин үөрүүлээх быһыыга-майгыга көрсөбүт. Кыайыы Знамята улууска үс күн буолуоҕа».
Салгыы Кыайыы символын Үрүҥ Хайа сэлиэнньэтигэр тиэртилэр. Ыам ыйын 5 күнүгэр Сааскылаах орто оскуолатыгар уонна гимназияҕа сырытыннардылар. Ити кэнниттэн бочуоттаах эргиири оҥорон, Улуу Кыайыы Знамятын республика тэбэр сүрэҕэр - Дьокуускай куоракка самолетунан илтилэр.