Ол сылтан номнуо 70 сыл ааста, билигин даҕаны бу Кыһыл знамя Улуу Кыайыы символынан буолар. Кыайыы 70 сыллаах үбүлүөйун чэрчитинэн Кыайыы Знамятын республика хас биирдии улууһа, нэһилиэгэ көрсөр.

Бу күннэргэ Знамя Ньурба улууһугар кэлэн барда. Ньурба уонна Сунтаар улуустарын кыраныыссатыгар – Ботомоойу үрэҕэр икки улуус делегацията Знамяны туттарыстылар.

Саха сиэринэн алгыс кэннэ, Знамя маҥнайгынан Күндээдэ нэһилиэгэр кэллэ. нэһилиэк олохтоохторо Улуу кыайыыны туоһутун үөрэ көрүстүлэр. Итиэннэ, бу көрсүһүү кэмигэр Ньурба улууһун аҕа баһылыга Борис Попов нэһилиэк тыыл бэтэрээннэригэр дойду президиэнин аатыттан үбүлүөйүнэй мэтээллэри туттартаата.

Бу кэнниттэн Кыайыы Знамята Октябрьскай нэһилиэгэр ыалдьыттаата. Онтон Хатыынан, Маалыкайынан, Малдьаҕарынан, Ньурбачаанынан айаннаан, улуус бары нэһилиэктэригэр сырытта.

Бэҕэһээ, муус устар 20 күнүгэр, Кыайыы Знамята Ньурба куораттан Марха уҥуоргу нэһилиэктэринэн айаннаан Үөһээ Бүлүү улууһугар тиийиэ.