Ньурба оройуонун 3 тыһ. тахса сэрии кыттыылаахтарын ааттара кыһыл гранит тааска суруллубут 2 миэтирэ үрдүктээх билиитэлэрэ тимир каркаска иҥиннэриллэн Буойун пааматынньыгын икки кытыытынан таныллыахтаах. Гранит билиитэлэр соҕуруу сакаастанан оҥоһулла сылдьаллар, кыһыҥҥы суолунан Ньурбаҕа кэлэллэрэ былааннанар. Болуоссат 3 тыһ. кв.миэтирэ иэннээх сирэ тротуар билиитэтинэн бүрүллүөхтээх, фонтан оҥоһуллуохтаах, благоустройстваҕа үлэ ыытыллыахтаах. Үлэлэр анаммыт кэмҥэ бүтэллэрин баһылык чуолаан бэлиэтээтэ.

Улуустан сэриигэ барбыт Аҕа дойду көмүскээччилэриттэн 1197-тэ төрөөбүт сирдэригэр төннүбэтэхтэрэ. Ньурбаттан барбыт саллааттар улахан аҥардара Москуба куораты көмүскээһиҥҥэ, Сталинград хонуутугар, Ржев анныгар, Курскай дугаҕа уонна Ильмен күөлгэ геройдуу охтубуттара. Бу сирдэр ийэ буордарын аҕалан Кыайыы болуоссатыгар Буойун пааматынньыгын тула биэс анаммыт уурунаҕа кыайыы туһугар олохторун олук уурбут саха саллааттарын буор куттарын төрөөбүт Ньурбаларыгар төнүннэрэргэ үлэ ыытыллара былааннанар.

«Ытык Сүбэ» чилиэннэринээн кэпсэтии түмүгэр тыылга өлбүт сэрии сиэртибэлэрин чуолаан ааттарынан буолбакка уопсай ахсааннарын ыйан өйдөбүнньүк бэлиэ турара ордук тоҕостооҕун, сөбө суох, чуолкайдамматах көрдөрүүлэр киирбэттэрэ наадатын быһаардылар.

Уопсастыбаннай тэрилтэлэр үлэлэрин бэрээдэктээн, былааннаан атын таһымҥа таһааран, оройуон олоҕор сүрүн тирэх, сөптөөх сүбэ буолар гына үлэ барыахтааҕын сөбүлэстилэр. Маны таһынан, улуус олоҕор баар биирдиилээн проблемаларга тохтоон кэпсэтии барда, диэн СИАҕа оройуон пресс-сулууспата иһитиннэрдэ.