Ньурбатааҕы техническэй лицей 9 «а» кылааһын үөрэнээччитэ Сардаана Герасимова бу күрэскэ хос эһээтин - саха снайпердарын хамсааһынын төрүттээччилэриттэн биирдэстэрэ Софрон Иванович Бушков туһунан кэпсээтэ. Ол төрүөтүнэн хос эһээтэ кэргэнинээн сэрии иннинэ түспүт хаартыскалара буолла. Маны сэргэ 1952 с. бэчээттэнэн тахсыбыт открыткаҕа Софрон Бушков уобараһа туттуллубут уонна кини эппит тыллара суруллубут диэн киэн тутта кэпсээтэ.

Маннык тэрээһин үһүс сылын ыытыллар. Күрэс кыттыылаахтарынан музей үлэтинэн интэриэһиргиир, иһиттэн үөрэтэн билэ-көрө сатыыр активист үөрэнээччилэр буолаллар. Дьүүллүүр сүбэ эдэр экскурсоводтар болҕомтону Улуу Кыайыы 70 сылын бэлиэтээһиҥҥэ уурбуттарын биһирээбитин биллэрдэ.

Биир хаартысканан оҕолор бүтүн дойду историятын сэгэтэн көрдөрдүлэр. Кинилэр хос эһээлэрэ, эбээлэрэ олорбут олохторун билэллэригэр, советскай норуот Улуу Кыайыыны ситиһиигэ оҥорбут сүҥкэн кылаатын өйдүү сылдьалларыгар маннык тэрээһиннэр көмөлөрө улахан.