Манна үлэ коллективтарын хамаандалара кытталлар. Кыайыылаах хамаанда, үгэс быһыытынан, сыл иккис аҥарыгар "Индигир уоттара" хаһыакка босхо сурутуунан наҕараадаланар.

Улуу Кыайыы 70 сылыгар анаммыт эстафетаҕа оройуон тэрилтэлэрин биэс хамаандата кытынна. Ол курдук, Муома орто оскуолатын, Муома начальнай оскуолатын (ЫБМ үлэһиттэрин кытта), аэропорт, “ЮРАЙТ” бэрээдэги араҥаччылыыр уорганнар, суут-сокуон үлэһиттэрин уонна дьаһалта хамаандалара илин-кэлин түһүстүлэр. Уон биир түһүмэхтээх эстафетаҕа оскуола икки оҕотун кытта улахан дьон сүүрдүлэр. Хамаандаларга салайааччылар эмиэ кыттан бииргэ үлэлиир дьоннорун көҕүлээтилэр. Быйылгы үбүлүөйдээх сүүрүүгэ уопсайа 55 киһи кытынна.

Түмүккэ Муома орто оскуолатын хамаандата бастакы миэстэҕэ таҕыста. Иккис миэстэни Муома начальнай оскуолатын уонна ЫБМ коллективтарын холбоһуктаах хамаандата ылла. Оттон үһүс миэстэни “ЮРАЙТ” сүүрүүктэрэ ылан үөрдүлэр-көттүлэр.

Кыайыылаах хамаанда "Индигир уоттара" хаһыакка 2015 сыл иккис аҥарыгар босхо сурутуунан уонна көһө сылдьар кубогынан наҕараадаланна. Бары миэстэлэспиттэр грамоталарынан, мэтээллэринэн бэлиэтэннилэр. Күрэхтэһиини Муома национальнай нэһилиэк (баһылык А.В. Андреев), "Индигир уоттара" хаһыат редакцията (редактор М.П. Старкова) уонна спорт отдела (В.А. Тарабукин) тэрийэн ыыттылар.