Улуу Кыайыы Знамятын Уус-Алдаҥҥа чиэстээтилэр

Соторутааҕыта Нам улууһун баһылыгын солбуйааччы А.Я.Яковлев, депутаттар сэбиэттэрин председателэ И.Р. Попов, ветераннар сэбиэттэрин председателэ С.Д. Кобякова, II Хомустаах баһылыга Д.К. Афанасьев, дьиэ кэргэн уонна ыччат политикатын управлениетын сүрүн специалиһа Ю.П. Жергина о.д.а. састааптаах Нам улууһун делегацията Улуу Кыайыы Знамятын Уус-Алдан улууһун Суотту нэһилиэгэр аҕалла. Ыаллыы сытар улуустан кэлбит делегацияны кыраныыссаҕа улуус баһылыгын солбуйааччы М.В. Борисов салайааччылаах бөлөх көрүстэ.


Знамяны Суотту нэһилиэгин Хоноҕор орто оскуолатыгар илтилэр. Тэрээһин үөрүүлээх чааһыгар Нам улууһун быһылыгын солбуйааччы Артур Янович биһиги улууспут баһылыгын солбуйааччытыгар Михаил Васильевичка Кыайыы Знамятын туттарда. Михаил Васильевич Кыайыы Знамятын эстафетата Уус-Алдаҥҥа саҕаламмытынан биллэрэн, Знамяны Суотту нэһилиэгин баһылыгын солбуйааччытыгар В.В. Потросоваҕа биэрдэ.
Салгыы Улуу Кыайыы символа Бороҕон нэһилиэгэр Тумулга тиийдэ. Сынньалаҥ киинэ Кыайыы тиэмэтигэр тэрээһини үрдүк таһымнаахтык тэрийбиттэрин бу күн Тумулга семинарга кытта кэлбит нэһилиэктэр баһылыктарын солбуйааччылара бэлиэтээн эттилэр. Кыайыы Знамятын чиэһигэр олохтоохтор уоттаах-күөстээх кэнсиэр туруордулар.
Кулун тутар 4 күнүгэр Улуу Кыайыы Знамятын Лөгөй нэһилиэгэр Кэптэнигэ Бороҕон нэһилиэгин баһылыга В.П. Алексеев күөрэччи тутан аҕалан нэһилиэк баһылыгар Н.В. Егороваҕа утары уунна. Тыыл ветераннара Кыайыы бэлиэтин көрсө кэлбит ыччакка сэрии иэдээн сылларын санаан ахтыы оҥордулар.

Салгыы Знамяны Дүпсүн нэһилиэгэр Лөгөй баһылыга илдьэ барда. Дүпсүннэр бу күн Кыайыы 70 сылыгар анаан фестиваль ыытаары сылдьар буоланнар, Кыайыы Знамятын тэрээһиннээхтик көрүстүлэр. Знамяны сэрии кэминээҕи ырыанан уонна салютунан Найахы нэһилиэгэр атаардылар.
Кыайыы Знамятын эстафетата Аҕа дойду сэриитин икки ветерана олорор нэһилиэгэр Найахыга тиийдэ. Манна тэрээһин музейга ыытылынна. Найахыттан чугас сытар Баатаҕайтан уонна Өспөхтөн ыалдьыттар кэллилэр. Тэрээһиҥҥэ түөрт ветеран кыттыыны ылла. Тэрээһин кэннэ Кыайыы Знамятын чиэстиир улуус делегациятын чилиэннэрэ Аҕа дойду Улуу сэрииитин икки ветераныгар - Семен Романович Заровняевка уонна Николай Николаевич Ивановка сырыттылар. Кырдьаҕас саллааттар Кыайыы Знамятын илиилэринэн тутан, харахтарынан көрөн олус долгуйдулар. Кэнэҕэски ыччакка сэрии хайдахтаах курдук алдьархайын кэпсээн, маннык иэдээн хатылыныа суохтааҕын өйдөттүлэр.
Бу күн эстафета Россия Геройа М.М. Стрекаловскай дойдутугар Өнөргө хонордуу тиийдэ. Кулуупка Кыайыы Знамятын суолтатын өйдүүр элбэх кырдьаҕас кэлбит. Ол эрээри ыччат ахсаана өссө элбэх этэ. Знамяны Найахы нэһилиэгин баһылыгын солбуйааччы П.А.Слепцов Өнөр баһылыгар А.А. Федоровка туттарда.
Сарсыныгар Кыайыы Знамята Мүрү, Байаҕантай, Тиит Арыы, Бээрийэ нэһилиэктэринэн айаннаата.