«Дьоруойдарга наҕарааданы туттарарыгар Россия президенэ Владимир Путин хас биирдиилэрин, тугу үлэлииллэрин, тоҕо маннык үрдүк наҕараадаҕа тиксибиттэрин иҥэн-тоҥон кэпсээтэ. Сахалартан бастакынан маннык үрдүк ааты ылбыт биир дойдулаахпыттан мин киэн тутуннум», - диэтэ кини.

Алексей Федотов Михаил Готовцевка 200 тыһ.солк. харчынан бириэмийэни туттарда.

Идэлээх сойуус 224 чилиэнин аатыттан М.Готовцевы Николай Дегтярев эҕэрдэлээтэ.

Михаил Готовцев биир дойдулаахтара кини үлэтин үрдүктүк сыаналаабыттарыгар махтанна. Олоххо, үлэҕэ бииргэ алтыһар Өлтөх нэһилиэгин дьонун Пролетарий Пантилов, Иван Дмитриев, Владимир Пестряков, Егор Жирков ааттарын киэн тутта бэлиэтээтэ. Кинилэрдиин күрэхтэһэн, илин-кэлин түсүһэн, үүтү ыаһыҥҥа аан бастакынан биэс тыһыынчалаах кирбиини куоһарбытын, үлэҕэ итинник сөптөөх күрэстэһии ситиһиигэ сүрүн олугу уурарын кини чиҥэтэн эттэ. Кини эппитинэн, элбэх сыл устата сүөһү боруодатын тупсарыыга туһаайыллыбыт үлэтин үтүө түмүгэ үрдүк ааты ыларга төһүү буолбут.