Уус-Алданнааҕы ис дьыала отделын полицейскайдара букатын өрдөөҕү, 1877 сыллаах тутууга, В.В.Никифоров–Күлүмнүүр улахан кыыһын дьиэтигэр, оттон Кэбээйи полициятын сотрудниктара 80-с сылларга тутуллубут дьиэҕэ үлэлээн кэллилэр. Онон, саҥа каркаснай модульнай дьиэҕэ киириилэрэ – улахан, умнуллубат кэрэ-бэлиэ түгэн.

Биир ый иһигэр үс полиция дьиэтэ аһыллара диэн – чахчы ситиһии. Өр сыллар усталарыгар быһаарыллан биэрбэтэх кыһалҕа үс былаас уорганын – федеральнай, өрөспүүбүлүкэтээҕи уонна муниципальнай – бииргэ сүбэлэһэн үлэлээһиннэрин түмүгэр быһаарылынна. Ис дьыала министрэ, полиция полковнига Владимир Прокопенко эҕэрдэ тылыгар иһитиннэрбитинэн, эһиилги сылга өссө түөрт улууска – Эдьигээҥҥэ, Өлөөҥҥө, Усуйаанаҕа уонна Тааттаҕа – эмиэ маннык модульнай дьиэлэри үлэҕэ киллэрэр былааннаахтар. «Ханна да сулууспалаатарбын, бастатан туран, сотрудниктарым үлэлиир усулуобуйаларын тупсарарга кыһаллабын», - диэтэ. Ис дьыала министиэристибэтин аатыттан отделларга УАЗ массыыналар күлүүстэрин туттартаата.

Министр бэлиэтээбитинэн, чуолаан бу Уус-Алданнааҕы уонна Кэбээйитээҕи ис дьыала отделларын дьиэлэрин тутарга федеральнай бюджеттан үп-харчы көрүллэригэр Россия ис дьыалаҕа министрэ Владимир Колокольцев быһаарыыта төһүү буолбут. Манна үлэтинэн кэлэ сылдьан, биһиги полицейскайдарбыт хайдах усулуобуйаҕа сулууспалыылларын илэ хараҕынан көрөн баран, итинник дьаһалы таһаарбыт.

Полиция эрэ буолуо дуо, бу улуустар олохтоохторо эмиэ сүргэлэрэ көтөҕүллэн, саҥа дьиэ аһыллыытыгар үөрэ-көтө кытыннылар. Уус-Алдаҥҥа «Кэнчээри» Россия образцовай, оҕо норуодунай ансаамбыла сэргэх ырыатынан-тойугунан, үҥкүүтүнэн, хомусчут оҕолор дьүрүһүйэр хомус тыаһынан эҕэрдэлээтилэр. Оттон Кэбээйигэ полиция капитана Валерий Дьяконов «Офицеры» ырыаны толорон, саалаҕа олорооччулары барыларын долгутта.

Дьэ, онон, саҥа дьиэлэммит-уоттаммыт дьонтон - Горнай, Уус-Алдан, Кэбээйи полициятын үлэһиттэриттэн, үрдүк көрдөрүүлэри, ситиһиилээх сулууспаны эрэйэбит.