Республикаҕа ОДЬКХ ГУТ инвестиционнай программатынан Орто-Сурт нэһилиэгэр Ижевтээҕи хочуол собуотун үс КВр-1,44 хочуоллаах таас чоҕунан үлэлиир саҥа квартальнай хочуолунайа тутулунна. Хочуолунай кыамтата – 4,32 мвт. Эргэ хочуолунайдары сөргүтэргэ 1079 п.м уһуннаах ититэр ситим тардылынна. Саҥа ититэр ситимҥэ 4 олорор дьиэ уонна 2 административнай тутуу холбоннулар.

Кэптиҥҥэ инвестиционнай программанан урукку 2,4 мвт кыамталаах хочуолунай оннугар 4,64мвт кыамталаах «Квартальнай» хочуолунай тутулунна. Ити нэһилиэк бары социальнай эбийиэктэрин, чааһынай дьиэлэрин итиинэн хааччыйыа.

Үөрүүлээх тэрээһиннэргэ СР олох-дьаһах коммунальнай хаһаайыстыбатын уонна энергетикэтын миниистирэ Алексей Колодезников, ОДЬКХ генеральнай директорын бастакы солбуйааччы, кылаабынай инженер Юрий Хмельницкэй, «Сахаспецтранс» генеральнай директора Яков Сидоров, Горнай улууһун баһылыга Никита Андреев, Горнайдааҕы ОДЬКХ ГУТ филиалын директора Владимир Васильев, нэһилиэктэр баһылыктара кытыннылар.