Амма улууһугар Татарка үрэҕи туоруур саҥа тимир муоста үлэҕэ киллэрилиннэ


Муоста устун сырыыны аһар үөрүүлээх сиэргэ-туомҥа улуус баһылыга Николай Архипов, „Аммавтодор“ ААО генеральнай директора Александр Окороков, „Амма-Суол“ ХЭТ тэрилтэ директора Константин Слепцов, Покровка нэһилиэгин баһылыга Олег Черкашин, Болугур нэһилиэгин баһылыга Вячеслав Потапов эҕэрдэ тыллары эттилэр. Кинилэр муоста бу эҥэр нэһилиэктэргэ олус суолталааҕын уонна кылгас кэм иһигэр тутуллубутун бэлиэтээтилэр. Улуус баһылыга муоста тутуутугар үлэлээбит бастыҥ үлэһиттэргэ - суол маастарыгар Андрей Никитиҥҥэ, рабочайдарга Прокопий Нестеревкэ, Алексей Сметаниҥҥа уонна бульдозерист Андрей Кочаткиҥҥа бэйэтин Махтал суруктарын туттарда. Покровка нэһилиэгин „Полюшко“ фольклорнай бөлөҕө бэйэтин ырыатын тутааччыларга бэлэхтээн олохтоохтор махталларын тиэртэ. Дьэ онтон муоста аһыллыбытын, сырыы саҕаламмытын билиэтээн аалай лиэнтэни быстылар.
- Маҥнай бастаан уутун хачайдаабыппыт. Улахан хаспах этэ. Онтон улахан таастары тиэйэн аҕалан, тэҥнээн муостабыт олоҕун оҥорбуппут. Бу бастакы тимир муостабыт. Ол иннинэ мас муосталары туттахпыт дии. Кэнники кэмҥэ сайыҥҥы уу олус күүстээх буолла. Улахан ардахтар кэннилэриттэн иккистээн-үһүстээн халаанныыр, ону мас муосталар тулуйбаттар. Суурайан илдьэ бара турар,- диэн маастар Андрей Никитин кэпсиир.

- Муоста уопсай суумата 9 мөл. солкуобайтан тахса буолла. Мин муоста тутуутугар баһыттан-атаҕар диэри сылдьыспыт кырдьаҕас үлэһиппин Андрей Никитини бэлиэтиэхпин баҕарабын. Кини биригээдэтинээн түүннэри-күнүстэри, өрөбүлэ суох үлэлээтилэр. Муоста уһуна 26,5 миэтэрэ, кэтитэ - 3 м 60 см. Конструкциятын Иркутскай уобалас Свирскэй куоратыттан аҕалбыппыт. Массыына сылдьар орто ремонтнай муостата диэн буолар. Уйуга 60 тонна. Тутуубут өр сылларга сулууспалыа диэн эрэнэбит. Манна биһиэхэ улахан көмөнү Константин Слепцов салайааччылаах „Амма-Суол“ тэрилтэ оҥордо. Кинилэр маннык муосталары оҥорууга опыттаахтар. „Бөтүҥ“ суолугар үс муостаны туруорбуттара. Онон кинилэргэ махталбыт улахан, - диэн этэр генеральнай директор Александр Окороков.

-Муниципальнай суолларбытыгар муосталарбыт кыһалҕа буолбуттара ыраатта. Манна үлэ ыытыллар. Ааспыт сылга үс муостаны оҥорбуппут. Быйыл бу Татарка муостата бастакынан тутулунна. Аны бу кэнниттэн Тиргэлээх үрэҕи туоруур муостаны тимиринэн оҥоруохпут. Мээндигиттэн Сулҕаччыга диэри суолга үс муоста тутулла сатыыр да, кыайан бүппэккэ турар. Бу муосталары красноярскайдар, куонкуруһу кыайан баран, бүтэрэ иликтэр, онон уу кэллэҕинэ суол быстар кутталлаах. Бу бастатан туран оскуоланы бүтэрээччилэр БКЭ-ни туттаралларыгар эрэйи үөскэтииһик. Муниципальнай суоллары оҥорууга анал программа ылынан, онон көрөн үлэни ыытабыт. Ону таһынан ходуһаларга, үрэхтэргэ тахсар суоллары көннөрүүгэ, муосталары оҥорууга ылсыахпыт, - диэн улуус баһылыга Николай Архипов санаатын үллэһиннэ.