Эрдэ былааннаммытын курдук, “Берёзовское” КП табатын ахсаанын элбэтэр инниттэн, министиэристибэнэн 500 табаны ыларга үп көрүллүбүтэ. БастаанТомпо Тополиное сэлиэнньэтиттэн ылар былаан баара да, онно ыарыы туран, атын улуустартан көрдөөһүн үлэ ыытыллыбыта. Ол түмүгэр 100 табаны Өймөкөөнтөн, 400 төбөнү Аллараа Халыма улууһуттан ыларга дуогабар түһэрсиллибитэ.

Табалары “Берёзовское” КП дириэктэрэ А.В.Колесов бэйэтэ арыаллаан аҕалла. Кинини кытта ветеринарнай управлениеттан Е.Н.Третьяков уонна үс табаһыт сылдьыстылар. Онон бу курдук тэрээһиннээхтик оҥостон барыы түмүгэр улахан сүтүгэ суох кэллилэр. Ыраах айан кэмигэр аара үс таба өлбүт. Ол төрүөтүнэн бэйэ-бэйэлэрин тэпсиһиилэр буолбут.

Өймөкөөн табаларын Берёзовкаҕа тиэрдэн баран, бу массыыналар аны Аллараа Халыматтан 400 табаны аҕалыахтаахтар. Айылҕа хайдах туран биэрэринэн, барыларын тиэйэн аҕалар сорук турар.