Мас-реслиҥҥэ аан дойдутааҕы федерация ыҥырыытынан Азербайджантан, Венгрияттан, Казахстантан, Польшаттан, Россияттан уонна Узбекистантан мас тардыһааччылар кытыннылар. Кинилэр 125 кг диэри ыйааһыҥҥа күрэхтэстилэр.

Сергей Фролкин кыайыа диэн ким да эрдэттэн сэрэйбэтэҕэ, билбэтэҕэ. «Турнирга мин кыайарга бигэ санаалаах киирбитим. Кыахпын тилэри туһанным», - диэн кини күрэхтэһии кэнниттэн санаатын эттэ.

Сергей Фролкин Томпо улууһугар төрөөбүтэ. Дмитрий Коркин аатынан Чурапчытааҕы спорт оскуолатыгар үөрэммитэ. Мас тардыһыытыгар үс сыл дьарыктаммыта. Ити кэм устатыгар юниордар ортолоругар, өрөспүүбүлүкэ чемпионатыгар кыайбыта, Россия чемпионатыгар боруонса мэтээли ылбыта.