“Саха киинэтин ахсаабат пропагандиһа Сергей Анашкин (Екатеринбург) бэйэтин баҕатынан илдьэн көрдөрбүт этэ. Эҕэрдэлээбиттэригэр бэйэм да соһуйан хааллым. Үлэбит маннык үрдүктүк сыаналаныа диэн түһээн да баттаппакка сылдьыбытым, - диир Прокопий Романович.

2012 сыллаахха уһуллубут «Мас ат» кылгас кээмэйдээх киинэҕэ сүрүн оруолларга Нөмүгү олохтоохторо: Саша Константинов, Павел Скрябин, Марик, Петя Ивановтар, Айаал Ефимов, Александр, Анастасия Даниловтар, 80 саастаах ытык кырдьаҕас Владимир Яковлевич Олесов оонньообуттара. Сценарийын Прокопий Романович суруйааччы Павел Харитонов-Ойуку оҕо сааһын туһунан ахтыытыгар олоҕуран суруйбута.

«Мас ат» Саха сиригэр 3D формакка уһуллубут бастакы киинэнэн буолар. Прокопий Романовичка бу үлэтигэр оператордарынан Иннокентий Аммосов, Юрий Бережнев, Александр Лукин, худуоһунньугунан Петр Бояркин, ВГИК студена Саргы Скрябина уонна Ньургун Ноговицын үлэлэспиттэрэ. Видеоаппаратураны Хотугулуу-Илиҥҥи федеральнай университет (Евгения Михайлова) уларсыбыта.

Бэйэтэ туспа көрүүлээх, суоллаах-иистээх режиссер бу бастакы ситиһиитэ буолбатах. «Кээрэкээн» (2002 с.), «Оҕо куйуурдуу турара» (2003 с.) киинэлэрэ, «Эллэйаада» үөрэнээччилэр экологическай экспедицияларыгар сылдьан устубут үлэлэрэ кириитиктэр, көрөөччүлэр үрдүк сыанабылларын ылбыттара, республикатааҕы айар куонкурустар кыайыылаахтарынан буолбуттара.