Балаҕан ыйын 30 күнүгэр "Саханефтегазсбыт" дириэктэрдэрин сэбиэтин мунньаҕа буолбута. Онно ылыллыбыт быһаарыыга олоҕуран, сыананы үөскэтии урукку схематыгар төннүөхтэрэ.

Бензиҥҥэ уонна дизель уматыгар сыана урукку өттүгэр сыл устата үстэ уларыйара: тохсунньу, бэс ыйын уонна сэтинньи бастакы күннэригэр. 2013 сылтан ыла сыана сылга иккитэ уларыйар буолбута.  

"Маннык быһаарыы сөбө суоҕа билиннэ. Сыана сылга иккитэ уларыйыытын түмүгэр сыана хас эмэ бүк эбиллибитэ. Ити түмүгэр аймалҕан тахсыбыта уонна өрөспүүбүлүкэ былааһа сөптөөхтүк дьайбыта. Биһиги инникитин буолуохтаах, сабаҕаланар инфляция иһин көрсүөхтээх ороскуоту киллэрэн биэрбиппит. Ити түмүгэр 1 лиитэрэ бензин сыаната 6 солк. эбиллэ түспүтэ. Бензин, уматык сыанатын сылга үстэ үрдэтэр эрдэхпитинэ, сыана үрдээһинэ 1,5 солк. улаатара", - диэтэ компания дриэктэрэ Игорь Никитин.

Бу сыл бэс ыйыгар бу тула буолбут араллааҥҥа өрөспүүбүлүкэ баһылыгын э.т. Егор Борисов быһаччы орооһуутун кэнниттэн нефть бородууктатын сыаната оннугар түспүтэ. Билигин компания 20 сыл устата үлэлии турбут урукку схемаҕа төннөр.

"Нефть бородууктатыгар сыана урукку курдук сылга үстэ уларыйыаҕа. Билигин биһиги күрэстэһээччилэрбит сыананы үрдэттилэр, оттон "Саханефтегазсбыт" сэтинньи 1 күнүгэр диэри быһар сыаната уларыйбат", - диэн бигэргэттэ компания салайааччыта Игорь Никитин.