Эдэр ыаллар баллара, үгэс быһыытынан, уопсай үҥкүүттэн саҕаланна. Сыбаайба таҥастаах тоҕус паара эдэр ыал 2013 сыл бастыҥын аатын ылар иһин күрэхтэстилэр: Александр уонна Ирина Марусенко, Василий уонна Саргылана Демьяновтар, Юрий уонна Светлана Лукьяненко, Евгений уонна Татьяна Кривошапкиннар, Анатолий уонна Анастасия Реевтэр, Максим уонна Алёна Павловтар, Илья уонна Наталья Алексеевтар, Эльдар уонна Инга Ившиннар, Денис уонна Анастасия Аргуновтар.

Бастакы конкурс - «Дьиэ кэргэн бырааһынньыга». Кыттыылаахтар визвиткаларын эрэ буолбакка, кинилэр дьиэлэригэр чопчу календарнай бырааһынньыгы хайдах бэлиэтииллэрин көрдөрүөхтээхтэрэ.

Иккис конкурс куораты тупсарыыга, экология кыһалҕаларыгар, айылҕаҕа харыстабыллаах сыһыаҥҥа анаммыта: «Эдэр ыал - экология харыстабылыгар». Социальнай роликтары кыттыылаахтар эдэр ыал Балларын иннинэ устубуттара, манна айымньылаах сыһыан, аныгы өйдөбүл уонна теманы арыйыы сыаналаналлар. Уонна, бүтэһик, үһүс конкурс - «Сюрприз» - кырдьык да, бырааһынньыктааҕы киэһэ кыттааччыларыгар уонна ыалдьыттарыгар соһуччу үөрүүнэн буолла. Быйыл бу конкурска кыра оҕолор кыттыбыттара. Кыттааччы-пааралар оҕо саҥатын таба өйдүөхтээхтэрэ. Конкурс олус көрдөөхтүк ааста.

Салгыы «Бастыҥ хаартыска», «Бастыҥ видео» уонна «Бастыҥ үҥкүү» номинациялар быһаарылыннылар. «Бастыҥ хаартыска» номинацияҕа кыайыылааҕынан Денис уонна Анастасия Аргуновтар (фотограф Жека Ураанхай) - «ZodiaC» культурнай киинтэн бириис. «Бастыҥ видео» номинацияҕа Илья уонна Наталья Алексеевтар таҕыстылар (оператор Александр Красновскай) - «Свадебный Якутск» сурунаалтан бириис. Онтон бастыҥ үҥкүүһүттэринэн Александр уонна Ирина Марусенко буоллулар - «Северная роскошь» ювелирнай салонтан бириис.

«Пара года-2013» аатын Аргуновтар ыллылар. Фанфар тыаһынан доҕуһуолланан тэрээһин спонсора - «Хикари» турфирма конкурс кыайыылаахтарыгар икки путевка туттарда. Конкурс бары кыттыылаахтарыгар ЗАГС Управлениетыттан өйдөбүнньүк дипломнар уонна бэлэхтэр туттарылыннылар.