Элбэх чинчийээччилэр, көннөрү саха дьоно да, биһиги норуоппут чулуу уола туох-ханнык иннинэ ким этэй: общественнай уонна государственнай деятель дуу, философ, суруйааччы эбэтэр учуонай дуу диэн ыйытыыга хоруйдуу сатыыллар.

Итиннэ харданы сэтинньи 21 күнүгэр Бүтүн Россиятааҕы «Россия культурнай эйгэтигэр Ойуунускай уус-уран нэһилиэстибэтэ» диэн студеннар научнай-практическай конференцияларыгар биэрэ сатыахтара.

9 секция үлэлиир. Бастакыга Ойуунускай поэзиятын эйгэтин ырытыахтара, иккискэ — кини саха уус-уран прозатын сайдыытыгар кылаатын көрүөхтэрэ, атыттарыгар — культура уонна фольклор сайдыытыгар оруолун. Туспа хайысханан кини национальнай литератураҕа сабыдыала ылыллар. Кини уус-уран нэһилиэстибэтэ хас да өрүтүнэн чинчийиллиэҕэ: тылбаас уонна стиль кыһалҕалара, литературнай айымньылар тылларын уратылара, суруйааччы айымньыларын холобуругар лексика уонна морфология боппуруостарын чинчийии. Этнопедагогика: үөрэххэ үгэстэр уонна инновациялар, ону таһынан кини общественнай уонна государственнай деятель быһыытынан оруола ырытыллыа.

177 дакылаат киирдэ. Туваттан уонна Алтайтан ыалдьыттары ыҥырдылар.

Үөрүүлээх аһылыыга кыттыылаахтары ХИФУ салалтата, наукаҕа, үөрэххэ, культураҕа уонна иһитиннэрэр-биллэрэр эйгэҕэ Госкомитет бэрэстэбиитэллэрэ эҕэрдэлээтилэр. Ойуунускай аныгы көлүөнэҕэ ураты оруолун уонна холобурун ыччат уонна дьиэ кэргэн политикатын миниистирин бастакы солбуйааччы Гаврил Семенов бэлиэтээтэ. Эһэтин үбүлүөйүнэн суруйааччы хос сиэнин — ХИФУ нуучча тылыгар кафедратын старшай преподавателин Мария Соловьеваны эҕэрдэлээтилэр.