Үөрэх академиятын член-корреспондена Е.Михайлова РҮӨА-тын уопсай мунньаҕар сырытта. Манна тэрилтэ биэс сыл болдьохтоох саҥа салалтатын талыы буолла.

Кандидаттар программаларын билиһиннэриилэри кэнниттэн быыбар буолла, ол түмүгүнэн РҮӨА президенинэн Людмила Вербицкая талылынна (РҮӨА академига, филологическай наука доктора, профессор, урут – СПбГУ ректора), вице-президеннарынан – Давид Фельдштейн (психологическай наука доктора, профессор, М.В.Ломоносов аатынан МГУ психологическай факультетын бочуоттаах профессора) уонна Геннадий Бордовскай (физ.-мат.н.д., профессор, РҮӨА академик-тэрийээччитэ, урут – Герцен аатынан СПбГПУ ректора). ХИФУ ректорын санаатынан, олус дьоһуннаах уонна табыгастаах кандидатуралар:

«Биһиги региоммутугар бу кандидатуралар олус табыгастаахтар, бары биһиги дойдубутугар үчүгэй сыһыаннаахтар, биһиги уратыбытын өйдүүллэр. Людмила Алексеевнаны кытта кэпсэтиибитигэр кини Саха сирин таптыырын туһунан эппитэ. Сэтинньи 6-7 күннэригэр биһиги университеппытыгар Россия үөрэҕин академиятын көһө сылдьар мунньаҕа ыытыллыа», - диэтэ федеральнай кыһа ректора.

РФ үөрэҕин уонна наукатын миниистирэ Дмитрий Ливановы кытта көрсүһүүгэ федеральнай университет билиҥҥи сайдыытын уонна 2015-2022 сс. инники сайдыытын дьүүллэстилэр уонна ДВ уонна Забайкальскай регион үбүлээһинин госпрограмматыгар киллэрэргэ бэйэлэрин санааларын бигэргэттилэр. Онно Тихэй океаннааҕы государственнай университет уонна ХИФУ киллэриллибиттэрэ.

ДВ сайдыытын саҥа миниистирин Юрий Трутнев аатыгар Дмитрий Ливанов илии баттааһыннаах итиннэ сөп түбэһэр суруга бэлэмнэннэ.

Итини таһынан министерство ХИФУ саҥа уопсай дьиэтигэр эбии үп биэриэҕэ: ааспыкка РФ правительствотын дьаһалынан үбүлээһин 5 бырыһыанынан аччатыллыбыта.

ХИФУ ректора, Ил Түмэн депутата Евгения Михайлова итини таһынан РФ Госдуматын үөрэхтээһиҥҥэ сис кэмитиэтин чилиэнин Григорий Балыхины кытта көрүстэ. Е.Михайлова Г.Балыхинныын кэпсэтиитигэр үөрэх сокуонугар федеральнай университеттар үлэлэрин салайар чааһыгар уларытыылары киллэрэргэ эттэ. Госдума депутата Е.Михайлова этиилэрин сэҥээрдэ уонна итини түргэнник Дума депутаттарын көрүүлэригэр киллэрэргэ эттэ, диэн СИА-ҕа ХИФУ-тан иһитиннэрдилэр.