«Бастайааннай бэрэстэбиитэлистибэ билиһиннэрэр эрэ аналлаах буолбакка, сүрүн дьайыытынан быһаччы экономическэй программалары олоххо киллэриигэ үлэни күүһүрдүү уонна республикатааҕы итиэннэ федеральнай былаас органнара көдьүүстээхтик алтыһалларыгар бары усулуобуйаны тэрийии буолуохтаах. Бэрэстэбиитэлистибэ Саха сирин уонна Дальнай Восток социальнай-экономическэй сайдыыларын далааһыннаах программаларын бэлэмнээһиҥҥэ уонна олоххо киллэриигэ республика иннигэр турар соруктары учуоттуохтаах. Билиҥҥи кэмҥэ үп-харчы-экономическэй хайысхалаах үлэ инники күөҥҥэ тахсыахтаах», - диэтэ республика президенэ Егор Борисов, коллективка СР РФ Президенигэр саҥа бастайааннай бэрэстэбиитэлин билиһиннэригэр. Республика баһылыга постпредство туруоруллубут соруктары ситиһиилээхтик толороругар уонна былаас федеральнай органнарын, министерстволары, ведомстволары уонна бөдөҥ хампаанньалары кытта үлэни көхтөөхтүк ыытарыгар эрэлин биллэрдэ.

Алексей Стручков Егор Борисовка итэҕэлин иһин махтанна уонна: «Бүгүн федеральнай органнар уонна субъектар администрацияларын икки ардыгар сыһыаннар лаппа уларыйдылар. Баар экономическэй уонна политическай усулуобуйаларга республика социальнай-экономическэй сайдыытын боппуруостарыгар биир санааны булуохха наада. Киин уонна регион сыһыаннарыгар саҥа ньымалары булуохтаахпыт. Саҥа усулуобуйаларга постпредство госпрограммалары бэлэмнээһин инники кэрдиистэригэр көхтөөхтүк кыттыахтаах, оччоҕуна республика интэриэстэрин муҥутуур учуоттааһын оҥоһуллуоҕа», – диэтэ.

Көрсүһүү түмүгэр республика президенэ бу тэриллии саҥа таһымҥа тахсыбытынан, постпредство үлэтин эппиэтинэһин үрдэтии ирдэнэрин өссө төгүл бэлиэтээтэ.