Киирии тылы «Мэҥэ-Хаҥалас улууһа» муниципальнай оройуон баһылыга Николай Старостин эттэ. Кини бары олохтоохтору уонна ыалдьыттары үгэс буолбут быыстапкалар саҕаламмыттарынан эҕэрдэлээтэ, табыгастаах атыыны баҕарда. Кыһыл лиэнтэни быһыы кэнниттэн сүүһүнэн атыылаһааччылар атыы-эригэн киинин уонна быыстапканы толору сыаналыыр кыахтаннылар.

«Сатал-2013» уонна «Идэhэ-2013» баастапкаларга 100-тэн тахса тэрилтэ, ол иһигэр республика 4 улууһуттан биирдиилээн предпринимателлэр, норуот маастардара, крестьянскай хаһаайыстыбалар уонна тус подсобнай хаһаайыстыбалар кытыннылар.

Күн устата АК таһыгар уонна иһигэр араас ас-таҥас, эгэлгэ оҥоһуктар хото тардылыннылар. Кырдьык да, чаҕылхай кыһыҥҥы бырааһынньык буолла, манна хас биирдии кэлбит киһи бэйэтэ сөбүлүүрүн булан атыыласта, көрдө-иһиттэ.

Атыы-быыстапка кэмигэр дьүүллүүр сүбэ талыытынан 5 номинацияҕа кыайыылаахтар быһаарылыннылар.

Аһаҕас куоластааһын түмүгүнэн «2013 сыл түмүгүнэн бастыҥ предприниматель» алта номинациятынан билиннилэр:

1. «Тыа хаһаайыстыбатын бородууксуйатын оҥорууга уонна батарыыга бастыҥ предприниматель» - «Сардаана» КХ баһылыга Еремей Герасимович Сергеев, Бүтэйдээх;

2. «Общественнай аһылык эйгэтигэр бастыҥ предприниматель» - биирдиилээн предприниматель Терентий Николаевич Егоров, «Утум» банкетнай саала, Төҥүлү;

3. «Сувенирдары, уус-уран оҥоһуктары оҥорууга бастыҥ предприниматель» - биирдиилээн предприниматель Петр Петрович Егоров, «Туойаана» мастарыскыай, Майа;

4. «Нэһилиэнньэни олох-дьаһах өҥөлөрүнэн хааччыйыы эйгэтигэр бастыҥ предприниматель» - биирдиилээн предприниматель Сардана Гаврильевна Иванова, «Lily» баттах салона, Аллараа Бэстээх;

5. «Транспорт өҥөлөрүгэр бастыҥ предприниматель» - биирдиилээн предприниматель Иван Иванович Румянцев, «Айан» диспетчерскэй сулууспа, Аллараа Бэстээх;

6. «Килиэп аһы астааһыҥҥа бастыҥ предприниматель» - биирдиилээн предприниматель Алексей Егорович Иванов, «Майа» ХЭТ, Майа н.;

Быыстапканы үөрүүлээхтик сабыы түмүгэр тэрийээччилэр манна кыттыбыттарга уонна ыалдьыттарга махтаннылар, 2014 сыл күһүһүгэр эмиэ көрсүөхпүт диэн эрэллэрин биллэрдилэр.