«Республика правительствота сылын аайы улуустарга отчуоттуур. Отчуот кэмигэр дьон-сэргэ киллэрбит этиитигэр, туруорсуутугар олоҕуран сөбүлэһии оҥоһулунна. Муниципальнай тэриллиилэр баһылыктарыгар улахан эппиэтинэс саҥа докумуон ыстатыйаларыгар ыйылыннылар», - диэтэ правительство председателэ  Галина Данчикова. 

«Хардарыта дьайсан үлэлээһин саҥа формата олохтоох бэйэни салайыныыны быһаарар сокуону утарбат. Оройуон баһылыгын салайар, сүрүннүүр уонна тэрийэр эппиэтинэһин чопчутук ыйар. Сөбүлэһиигэ дьон туруорсар тутуута киирбэтэ. Ити государственнай бырагыраамаларга бааллар», - диэтэ кини.

Муниципалитеттар үп-харчы өттүнэн тутулуга суох буолалларыгар сөбүлэһиигэ сүрүн болҕомто ууруллар. Итиннэ тирэҕирэн муниципалитет социальнай суолталаах боппуруостары быһаарар уонна дьон олоҕун таһымын үрдэтэр кыахтанар. 

«Сөбүлэһии чэрчитинэн олохтоох уонна регион бюджетын дохуоттаах чаастара улаатарыгар правительство уонна муниципалитеттар кыахтарын холбуур сыаллаах үлэ барар. Инньэ гымматахха, социальнай эбэһээтэлистибэлэр олоххо киирэллэрэ уустугурар. Нолуок базатын хаҥатыыга дьулуһуохтаахпыт. Олохтоох таһымҥа оннук резервэ баар. Ол иһигэр баайтан-дуолтан, сиртэн киирэр нолуоктар. Дохуоппутун улаатыннарбакка, баары үллэрэбит эрэ», - диэн эттэ Галина Данчикова. 

Сөбүлэһии түһэрсиитэ федеральнай киин уонна республика хардарыта үлэлэригэр майгынныыр гына оҥоһуллубут.

«Федеральнай киини кытта сөбүлээһиинэн үлэлээбиппит ыраатта. Ити докумуоҥҥа сыалы ситиһэргэ субъектар эбээһээтэлистибэлэрэ чуолкайдык суруллар. Бүгүн илии баттыыр докумуоммутугар чопчу көрдөрүү: бырыһыан, ситиһии, баһылык үлэтин сыаналааһын барыта ыйыллар. Бу административнай күһэйии буолбатах, бу — уопсай сыалы-соругу ситиһэргэ хардарыта дьайсыы уонна кыаҕы түмүү баҕа өттүнэн оҥоһуллар докумуона», - диэн кини эбэн эттэ.

Бүгүн Үөһээ Дьааҥы, Ленскэй, Мииринэй уонна Нерюнгри улуустарын баһылыктарын кытта сөбүлэһиигэ илии баттаатылар.