- "Олоҥхо» Саха диаспората» уопсастыбаннай тэрилтэ Саха Өрөспүүбүлүкэтин Ил Түмэнин Бэрэссэдээтэлэ Александр Жирков көҕүлээһининэн Бишкек куоракка 2013 сыл от ыйын 22 күнүгэр тэриллибитэ. Саха сириттэн сылдьар биир дойдулаахтар түмсүүлэрин презентациятыгар аналлаах тэрээһиҥҥэ «Аан дойду норуоттарын эпостара» аан дойдутааҕы ассоциация президенэ, Кыргызстан Өрөспүүбүлүкэтин Геройа Бексултан Жакиев, Кыргызстан Өрөспүүбүлүкэтин Жогорку Кенеш (Үрдүкү Сэбиэтин) бэрэссэдээтэлин сүбэһитэ Сатина Бакешова уонна да атыттар кыттыбыттара.
- Онно саха парламенын спикерэ Александр Николаевич бэйэтин биир дойдулаахтарыгар 2012 сылга оҥоһуллан туруоруллубут Максим Аммосов пааматынньыгын көрө-истэ сылдьалларыгар сорук туруорбута. Саха норуотун чаҕылхай уола Максим Кирович Аммосов БСКП (б) Киргизия обкомун бастакы сэкирэтээринэн үлэлии сылдьан, кылгас да кэм буоллар, Киргизскай ССР саҥа олохтонуутугар үгүһү оҥорбута.
- Диаспора былыргы түүр омуктан төрүттээх икки норуоттар доҕордуу сыһыаннарын бөҕөргөтүүнэн, саха норуотун култууратын харыстыыр уонна тарҕатар үлэнэн дьарыктанар. Түмсүү чилиэннэрэ Кыргызстаҥҥа «Дьулуруйар Ньургун Боотур» олоҥхо кыргыз тылынан тылбаастаныытыгар тэрээһин боппуруостарын быһаарыыга көхтөөхтүк кыттыбыттара. Кыргызстаҥҥа Саха диаспоратын Саха сирин худуоһунньуга, Саха Өрөспүүбүлүкэтин искусствотын үтүөлээх үлэһитэ Николай Иннокентьев кыыһа Ньургуйаана Иннокентьева салайар.
- Бишкек куоракка үлэлиир «Олоҥхо» Саха диаспората Кыргызстан норуотун ассамблеятын чилиэнэ буолан туран, Кыргызстан Өрөспүүбүлүкэтин уонна элбэх омуктаах Российскай Федерация култуураларын икки ардыларыгар доҕордуу сыһыаны олохтуурга бигэ тирэх буолуоҕа.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети