«Урукку өттүгэр сыл аайы правительство отчуотун кэнниттэн правительство уурааҕа түмүгү таһаарара. Бу олус улахан уонна туолуута ыараханнык хонтуруолланар докумуоҥна кубулуйбута баар суол. Республика баһылыга туруорбут соруктарыгар тирэҕирэн, муниципальнай оройуоннар баһылыктарын кытта сөбүлэһии түһэрсиини быйылгыттан ыла киллэрэбит. Нэһилиэнньэни кытта көрсүһүүлэргэ көтөҕүллүбүт этиилэр бу сөбүлэһиигэ учуоттаннылар», - диэтэ правительство председателэ  Галина Данчикова. 

Маннык быһаарыы түмүгэр хардарыта дьайсыы ис дьиҥэ уонна ис хоһооно тосту уларыйар. «Правительство уурааҕар биир үксүн эбийиэктэри тутуу эрэ киирэрэ. Билигин сөбүлэһиигэ олоҕуран, правительство уонна улуус эппиэтинэстэрэ толору суруллар. Аныгыскы түһүмэххэ бу дьаһалы кэҥэтиэхпит: нэһилиэктэр баһылыктарын кытта түһэрсиэхпит.Үлэ көдьүүһэ, түмүгэ барыта чуолкайдык көстүөҕэ», -диэтэ Г.Данчикова.

Правительство Абый, Анаабыр, Булуҥ, уонна Эдьигээн баһылыктарын кытта бастакы сөбүлэһиилэргэ илии баттаатылар.