Аммаҕа "Оҕо уонна Олоҥхо" күрэс бастакытын ыытылынна

Соморсуннааҕы "Чэчир" уһуйаан (салайааччы Анна Лебедева) 1992 сыллаахха республикаҕа оҕону иитиигэ олоҥхо педагогикатын биир бастакынан киллэрбитэ. Ити сыл уһуйаан иитиллээччилэрэ Евдокия Владимирова туруоруутугар "Туналҕаннаах ньуурдаах Туйаарыма Куо" олоҥхону оонньоон көрдөрбүттэрэ.


Онтон ыла "Чэчир" уһуйаан кэлэктиибэ олоҥхо эйгэтигэр сүүрбэттэн тахса сыл ситиһиилээхтик үлэлиир. Билигин федеральнай таһымнаах стажировка площадкатын быһыытынан, улуус уһуйааннарыгар оҕоҕо олоҥхону үөрэтии уоппутун хото тарҕаталлар уонна семинардары тэрийэллэр. Араас таһымнаах күрэстэргэ ситиһиилээхтик кытталлар.
Быйыл "Оҕо уонна Олоҥхо" күрэһи улууска бастакытын тэрийдилэр. Тэрээһиҥҥэ улуус уон уһуйааныттан 110 оҕо кытынна. Күрэс үс көрүҥһнэнбарда - олоҥхону толорууга, олоҥхо дьоруойдарын көстүүмнэригэр уонна "Олоҥхо оҕо хараҕынан" диэн уруһуй куонкурсугар. Дьүүллүүр сүбэҕэ үөрэх управлениетын испэсэлииһэ Вера Чупрова, управление методиһа Эмма Давыдова, "Оллоон" фольклорнай бөлөх салайааччыта Анисия Софронова, Соморсун орто оскуолатын учууталлара Сардаана Борохина, Анна Кузнецова, Александра Сокольникова үлэлээтилэр.

Төрөппүттэр уонна иитээччилэр оҕолору күрэскэ олус кыһаллан бэлэмнээбиттэрэ бэлиэтэннэ. Оҕолор олоҥхо тылын-өһүн доргуччу ааҕан, ырыатын-тойугун чуолкайдык туойан, көстүүмнэрин кэтэн хааман көрдөрөн дьон биһирэбилин ыллылар. Саамай кыра саастаах толорооччунан (3 саастаах) Виолетта Матвеева буолла.
Түмүккэ кыайыылаахтарынан буоллулар; уруһуйга - Корнил Абрамов (Чапчылҕан), Ванесса Мутчурукова (Амма), Алина Корякина (Амма).

Олоҥхо таҥаһын көрүҥэр бастакы миэстэни "Кэнчээри" ОСК (Амма) "Сир симэҕэ" муода студията ылла, иккис миэстэҕэ "Дуораанчык" уһуйаан (Өнньүөс) тигистэ, "Чэчир" уһуйаан (Соморсун) үһүс миэстэ буолла. Олоҥхону толорууга Максим Иннокентьев (Сэргэ Бэс) кыайыылааҕынан буолла, Саша Федоров (Абаҕа) иккис, Виолетта Матвеева (Соморсун) үһүс буоллулар.
Олоҥхо тойугар бастакы миэстэни Сайаана Барабанова (Амма), иккиһи Валерия Федорова (Амма), үсүһү Анджелика Лебедева (Соморсун) ыллылар.
Надя Дьяконова "Мичээр" ОСК (Бөтүҥ) "Көмүскэс санаалаах Кэскил бухатыыр" олоҥхону (ааптар Юрий Борисов, Эмис нэһилиэгэ) ордук итэҕэтиилээхтик толорон күрэс сүрүн бирииһин хаһаайынынан буолла. Надя ааспыт ыйга ыытыллыбыт "Олоҥхо оҕото" республикатааҕы күрэскэ эмиэ кыайыыны ситиспитэ.

Олоҥхобут - саха тылын саамай сүмэтэ, үрдүкү чыпчаала - оҕону итиигэ туспа хайысха буолан туһаныллара кэрэхсэбиллээх. Педагогтар бэлиэтииллэринэн, олоҥхонон дьарыктанар оҕо тылын баайа хаҥыыр, толкуйдуур дьоҕура сайдар, санаатын сааһылаан саҥарар. Ону тэҥэ үтүмэн үйүлэри уҥуордаан кэлбит өбүгэлэрбит үгэстэрэ, сиэрдэрэ-туомнара кытта хабыллан, өйүгэр-санаатыгар хатанар. Саха оҕото сахалыы тыыҥҥа иитиллэр, ис кута күүһүрэр, олоххо бэлэмнээх буола улаатар.