"Саха сиригэр уопсайа мууһу туоруур 49 сир баар. Итинтэн Өлөөҥҥө эрэ мууһунан туорааһын саҕаламмыта. Дьокуускай чэрчитигэр «Хатас-Павловскай» хайысханан өрүһү туорааһын быһа холуйан сэтинньи 18 күнүгэр аһыллыахтаах. Оттон «Хаҥалас — Суотту» хайысханан ахсынньы 1 күнүгэр. «Хатас-Павловскай» - сэтинньи 18-гар, Дьокуускай — Аллара Бэстээх хайысханан сырыы саҕаланыахтаах», - диэн кылаабынай управлениеҕа эттилэр.

  Мууһунан туорааһын кэмэ муус халыҥыттан уонна күн-дьыл туругуттан көрөн уларыйыан сөп.  

 ЫБММ кылаабынай упралениетын, ГИБДД, ГИМС үлэһиттэрэ мууһунан туорааһыҥҥа рейдэ ыыттылар.

Рейд кэмигэр биллибитинэн, Хаҥалас-Суотту хайсханан сатыы да, массыыналаах да дьон сырыылара тохтообот. Кинилэр административнай эппиэтинэскэ тардылаллар.
Сэтинньи 13 күнүнээҕи туругунан СӨ административнай быраабы кэһии кодексын 9.10 ыстатыйатынан, уонна РФ кодексын 12.16 ыст.1 чааһынан уопсайа 40 боротокуолу толорбуттар.

Сатыы да, массыынанан да мууһу туорааччылар бу кэмҥэ айан кутталлааҕын туһунан бэркэ диэн үчүгэйдик билэллэр эрээри, син биир айаннаабыттарын курдук айанныы, сылдьыбыттарын курдук сылдьа туралларын туһунан Дьоҕус суднолар государственнай инспектордара Андрей Щелканин эттэ.

Дьоҕус суднолар кылаабынай инспектордара Аурика Смирнова эппитинэн, дьоҥҥо куттал суох буолуутун хааччыйар туһугар маннык рейдэлэр сотору-сотору ыытыллыахтара. Сокуону кэспиттэр эппиэккэ тардыллыахтара.